Құлсарыда жасөспірімнің өмірін қиған жол апатына кінәлі автобус жүргізушісі сотталды

Атырау облысында мотоцикл жүргізушісі қаза тапқан жол апатына қатысты сот үкімі шықты, деп хабарлайды Azattyq Rýhy «АқЖайыққа» сілтеме жасап.

Сот материалы бойынша 2025 жылғы 7 шілдеде Құлсары қаласында автобус жүргізушісі көше қиылысында жол белгісін елемей, кәмелетке толмаған жасөспірімнің басқаруындағы мотоциклмен соқтығысқан. Салдарынан бала есін жимастан ауруханада көз жұмған.

Прокурор сотталушыға 5 жыл мерзімге көлік құралдарын басқару құқығынан айыра отырып, 2 жыл 6 ай мерзімге бас бостандығынан айыру жазасын кесуді сұрады. Жәбірленушінің өкілі заң талаптарына сәйкес жаза кесуді сұрады. Сотталушы өз кінәсін мойындамады.

«Автобус жүргізушісі Қылмыстық кодекстің 345-бабының 3-бөлігі бойынша – абайсызда адам өліміне әкеп соққан жол қозғалысы ережелерін бұзғаны үшін кінәлі деп танылды», - деп жазды басылым.

Сотталушының асырауында жас балаларының болуы, бұрын сотталмағаны жаза мен қылмыстық жауапкершілікті жеңілдететін мән-жайлар ретінде танылды. Ауырлататын мән-жайлар анықталмады.

Сот сотталушыға 5 жыл мерзімге көлік құралдарын басқару құқығынан айыра отырып, 2 жыл 6 ай мерзімге бас бостандығынан айыру жазасы кесті. Сот үкімі заңды күшіне енген жоқ.