Павлодарда пневмонияға шалдыққан 30 науқас жасанды демалдыру аппаратына қосылды

Павлодарда өкпе қабынуына шалдыққандар саны тоқтаусыз өсіп барады. Облыс орталығында 30 науқас жансақтау бөлімінде жасанды демалдыру аппаратына қосылған, деп хабарлады облыстық Денсаулық сақтау басқармасы басшысының міндетін атқарушы Біржан Досмайылов.

Оның айтуынша, қазіргі таңда ауруханаларда мыңға жуық адам өкпе қабынуымен ем қабылдап жатыр.

«Соңғы бір тәуліктің өзінде 315 науқас келіп түсті. Қазіргі таңда провизорлық ауруханаларда 956 адам жатыр, оның 71-і ауыр халде. 30 науқас жасанды демалдыру аппаратына қосылған», - деді Б.Досмайылов.

Оның айтуынша, соңғы күндері тұмау тиген және пневмонияға шалдыққандар саны облыста 2,5 есеге артқан.

«Науқастар санының күрт артуы төтенше жағдай режимін алып тастағаннан кейін байқалды. Бұл дегеніміз, адамдар қауіпсіздік шараларын сақтамай, маска тақпай, бір-бірімен байланысқа түсті дегенді білдіреді. Салдарын қазір көріп отырмыз», - деді Досмайылов.

Айта кетейік, облыста коронавирус жұқтырғандар саны да артып барады. Бүгінге дейін өңірде 686 адам COVID-19 вирусын жұқтырып алған. Олардың 204-і ауруханада ем қабылдап жатыр. 24-нің жағдайы ауыр, екеуінің халі аса ауыр.