Мәжіліс депутаты азаматтар туралы мәлімет жиналатын «цифрлық портмоне» енгізуді ұсынды

Мәжіліс депутаты, «AMANAT» партиясы фракциясының мүшесі Екатерина Смышляева мемлекеттік басқаруда және Қазақстан экономикасының негізгі салаларында деректермен жұмыс істеу тәсілін түбегейлі қайта құру қажеттігін мәлімдеді, деп хабарлайды Azattyq Rýhy.

Екатерина Смышляеваның сөзінше, Президент Қасым-Жомарт Тоқаев Жолдауында цифрлық экономиканы дамыту мен жасанды интеллектіні енгізуді мемлекеттік саясаттың негізгі басымдығы ретінде атап өткен. Бұл жағдайда үлкен деректер стратегиялық ресурсқа айналуы тиіс.

«Алайда қазіргі талдау мемлекеттік органдардың қажетті деректердің небәрі 50 пайыздан сәл астамын ғана цифрландырғанын көрсетті. Салалар арасында айырмашылық айқын: қаржы мен әділет салаларында көрсеткіш 90%-дан жоғары, ал ауыл шаруашылығы, сауда, энергетика, экология және білім беру салаларында 30–40% деңгейінде қалып отыр. Деректердің сапасыздығына, қайталануына және ведомстволардың ақпаратты бөліспеуіне байланысты «деректер феодализмі» орын алған. Азаматтар мен бизнес бірнеше рет бір деректі қайта ұсынуға мәжбүр болса, қағаз құжаттар әлі де бар», - деді Смышляева.

Депутаттар Үкіметке мынадай ұсыныстарын жеткізді:

• мемлекеттік органдар арасында деректерді міндетті түрде алмасуды жолға қою;
• бір деректі бірнеше рет сұрау тәжірибесін және қағаз көшірмелерді жою;
• азаматтар туралы мәліметтерді жинақтайтын «цифрлық портмоне» енгізу;
• ұлттық деректер биржасын құру;
• деректерді пайдалану тиімділігін бағалау жүйесін енгізу;
• деректер жинау инфрақұрылымын (сенсорлар, телеметрия) қаржыландыру;
• деректер сапасын бақылауға жауапты мамандардың жұмысын күшейту.

Депутат «AMANAT» фракциясы аталған шараларға құқықтық қолдау көрсетуге дайын екенін жеткізді.