«Ұлттық Қор – балаларға»: 2026 жылы балалардың шотына ақша түспейтіні рас па

Бүгін брифинг өткізген Ұлттық банктің төрағасы Тимур Сүлейменов «биыл Ұлттық Қор инвестициялық табыс көрмей ме?» деген сұраққа жауап берді. Айта кетейік, Қазақстанда 18 жасқа толмаған балалардың шотына дәл осы инвестициялық табыстан түскен ақша тең бөлініп, таратылатын еді, деп жазады Azattyq Rýhy.

Тимур Сүлейменов Ұлттық қор биыл ғана емес, соңғы бірнеше жыл ішінде инвестициялық табысын арттырып отырғанына сендірді.

«Бағдарлама тоқтамайды. Яғни, балалардың есепшотына биыл да Ұлттық қордың инвестициялық табысынан пайда түседі. Бірақ, нақты қанша екені әзірге белгісіз», - деді Сүлейменов.

Оның айтуынша, 2025 жылдың 7 айында Қордағы ақшаны басқарудан түскен табыс 4,6 млрд долларға жеткен. Бұл – инвестициялық табыс 8 пайызға артты деген сөз дейді ол.

«Көріп тұрғандарыңыздай, инвестициялық табыс бар. Бірақ, биылғы табыстан балалардың шотына нақты қанша ақша түсетінін айту әлі ерте. Өйткені, жыл соңына дейін әлі неше бала туатыны, неше бала 18 жасқа толатыны, неше бала азаматтығын ауыстыратыны, неше бала елден көшіп кететіні белгісіз. Бүкіл ақпарат 2026 жылдың 31 қаңтарына дейін жаңарады да балалардың шотына ақша түседі», - деп сендірді Сүлейменов.