Қазақстандықтар АӘК алу үшін eGov порталы арқылы өтініш бере алады

ҚР Еңбек және халықты әлеуметтік қорғау министрлігі мемлекеттік инстанцияларда адамдардың жаппай жиналуына жол бермеу және азаматтардың коронавирустық инфекцияны жұқтыру қаупін азайту мақсатында, қазақстандықтарға 1 шілдеден бастап атаулы әлеуметтік көмек алу үшін eGov.kz электрондық үкімет порталы арқылы жүгінуді ұсынады.

Әкімдіктер мен халықты жұмыспен қамту орталықтарына жүгінетін азаматтар үшін алфавиттік тәртіппен өтініш беру кестесі көзделіп отыр. Халықтың жаппай шоғырлануын болдырмас үшін Еңбек министрлігі мемлекеттік инстанцияларға тиісті ұсыныс берді.

Сондай-ақ, III тоқсанда атаулы әлеуметтік көмек (АӘК) тағайындау мерзімі ұзартылмайды.

Айта кетерлігі, I тоқсандағы атаулы әлеуметтік көмек алушыларға сол кезде төтенше жағдай режимі енгізілуіне байланысты, төлемдер тағайындау мерзімі ұзартылған болатын.

Еліміздің барлық өңірінде АӘК көрсетудің жаңа тетігін іске асыру шеңберінде табысы аз отбасылардың мектеп жасына дейінгі балаларын кепілдік берілген әлеуметтік топтамамен қамтамасыз ету бойынша жұмыстар жүргізілуде.

«Ағымдағы жылдың 5 айында АӘК алушылардың жалпы саны 122,3 мың отбасын немесе 629,9 мың адамды құрады», - делінген хабарламада.

1 жастан 6 жасқа дейінгі балаларға арналған әлеуметтік топтама азық-түлік жиынтығын және тұрмыстық химия тауарларының жиынтығын қамтиды. 6 жастан 18 жасқа дейінгі балалар үшін мектептерде ыстық тамақ, оқу құралдары мен мектеп киімдерін беру көзделеді. Сондай-ақ, осы санаттағы балалар үшін мектепке дейін жол жүру ақысы өтелетін болады.

«Азық-түлік жиынтығы балалардың жас санатына байланысты ерекшеленеді: 1-ден 3 жасқа дейін және 3-тен 6 жасқа дейін, бірақ өңірге қарамастан әлеуметтік топтаманың құрамы бірдей болады. Жинақтардың құрамы физиологиялық ерекшеліктерді, азық-түліктің тағамдық және энергетикалық құндылығының арақатынасын және жасына сәйкес оларды пайдалану нормаларын ескере отырып, ҚР Денсаулық сақтау министрлігінің ұсынымдары негізінде қалыптастырылды. Өнімдер дәруменделген, бұл өсіп келе жатқан организмдегі дәрумендердің жетіспеушілігін толықтыруға мүмкіндік береді», - делінген ақпаратта.