«Бес адам қызметтен кетті»: Ұйғыр ауданында болған дау-дамайға қатысты әкімдік шешімі

Алматы облысы әкімінің баспасөз хатшысы Ғалмұрат Жүкел қалыптасқан ахуалға байланысты құрылған комиссия жұмысының ресми байламын жариялады, деп хабарлайды Аzattyq ruhy.

«Ұйғыр ауданындағы мәселеге қатысты облыстық комиссия құрылып, өңірде жұмыс жүргізді. Нәтижесінде, Ақтам орта мектебінің директоры Измахунов Октябрь Турганович, директордың тәрбие ісі жөніндегі орынбасары Қапсаламов Мұқаметқали, сонымен бірге, аталмыш мектептің биология пәнінің мұғалімі Кахарова Түрдибуви қызметінен босатылды. Бұдан бөлек, Ақтам ауылдық округі әкімі аппаратының спорт жөніндегі әдіскер-нұсқаушысы Камаев Сабиржан Суняцунович және Тиірмен ауылдық округі әкімі аппаратының жастар ісі жөніндегі әдіскер-нұсқаушысы Якярова Умида қызметінен кетті», - деп хабарлайды әкімдік.

Алдағы уақытта аталған жайттар қайталанбас үшін облыстық комиссия мүшесі, облыстық Қазақстан халқы Ассамблеясының хатшылық меңгерушісі Ғабит Тұрсынбай аудан белсенділерімен жүздесіп, түсіндірме жұмыстарын жүргізген. Аудан халқы бір адам кесірінен тұтас өңірге сөз тигенін алға тартып, мұндай келеңсіз жайттың орын алғанына өкініштерін білдірді.

Еске салайақ, Ұйғыр ауданы, Ақтам ауылында болған оқиға жайлы проблеманы журналист Қанат Әбілқайыр Facebook парақшасында көтерген.

«Осыдан бірер апта бұрын Ақтамда қазақ пен ұйғыр жастары арасында төбелес болады. Артынша Ақтам орта мектебінің 10-сынып оқушысы Турсунова Шахсанам өз ватсабының статусына «Қазақ жері деп кеуде кермей-ақ қойыңдар. Жер де, шаңырақ та Алланікі, соны біліңдер,  қазақ балалары. Сендерде күш жоқ, жеке шығып сөйлесуден қорқасыңдар. Ағаларыңа көрсетіп қойыңдар, если че, қыздар!» деген жазбасы шағады. 10-сынып оқушысы ұлтаралық жанжал туғызатын сөз айтып тұр. Оның бұлай "гәпіруі" сол аудандағы идеологияның тоқырап қалғанының белгісі емес пе?», - деп жазды ол.

Әңгіме бұл жазбамен ғана шектелмеген. Ізінше оқушы жазған сөзден мектеп мұғалімдері арасында жанжал туады. Ұйғыр мұғалімдер мектепте мемлекеттік тілде есеп беруден бас тарып, басшылыққа қыр көрсеткен.

«Мектеп ұстаздарының ватсап чатында өзінің онлайн сабағы жайында ұйғыр тілінде есеп берген биология және өзін-өзі тану мұғалімі Қахарова Турдибувиге басшылықтан (директордың орынбасары) есепті мемлекеттік тілде беру жайлы ескерту жасалады. Бірақ қазақ сыныптарына да сабақ беретін Қахарова ол ескертуге пысқырып та қарамай, қайта өзінің ісінің дұрыстығын айтып, мектептегі әр мұғалім қазақ және ұйғыр тілдерін білуге міндетті деп айды аспаннан бір-ақ шығарады (аудио-жазбасы қолымда бар)»,- деп жазды журналист.