«Birgemiz» қорынан 470 мыңнан астам отбасыға көмек көрсетілді – Бауыржан Байбек

«Nur Otan» партиясы Төрағасының бірінші орынбасары Бауыржан Байбек Елбасының тапсырмасымен «Birgemiz» қоры біржолғы төлемақы берудің үшінші кезеңін жүргізгенін мәлімдеді. Бұл туралы ол Facebook парақшасында хабарлады.

Бауыржан Байбек шағын қалалар мен ауылдардағы және ірі қалаларға іргелес елді мекендердегі 110 мыңнан астам мұқтаж отбасының 50 000 теңгеден алғанын атап өтті.

«Осылайша, бүгінгі таңда Нұрсұлтан Назарбаевтың бастамасы бойынша құрылған қоғамдық қор 470 000-нан астам отбасыны немесе 1,6 миллион қазақстандықты тікелей атаулы көмекпен қамтыды», - деді ол.

Сондай-ақ, «Jas Otan» жастар қанаты бүкіл ел бойынша 5 мыңнан астам волонтерді жұмылдырып, 256 мыңдай отбасыға азық-түлік себеттерін, маскалар мен ең қажетті заттарды жеткізіп берген. Халықтың қорғанысы әлсіз бөлігіне жататын 100 мың отбасыға 5 миллион тегін маска үлестірілген.

«Birgemiz» қоры есебінен Мақтаарал ауданындағы су басудан зардап шеккен Достық ауылының тұрғындары үшін жаңа үйлер құрылысы жүргізіліп жатыр. Жалпы, төтенше жағдайдың алғашқы күнінен бастап нұротандықтар еліміздің барлық өңірінен Түркістан облысына 1000 тоннадан астам азық-түлік, киім-кешек, құрылыс материалдары мен жеке гигиена құралдарын жіберді

«Жедел және үйлесімді жұмысы үшін барша партияластарға, жасотандықтарға, партияның өңірлік филиалдарына шынайы алғысымды білдіремін. Елбасының үндеуіне қолдау білдірген барша меценаттарға ерекше рақмет айтамын. Осы аптаның ішінде біз партиямыздың Лидері Нұрсұлтан Әбішұлы Назарбаевтың алғыс хаттарын табыстауды бастаймыз», - деді Бауыржан Байбек.