Ертеңнен бастап мопед жүргізушілері үшін жаза қатаңдайды – ІІМ

Қазақстанда 5 сәуірден бастап мопед жүргізушілері үшін жаза күшейеді. Бұл туралы ІІМ әкімшілік полиция комитетінің төрағасы Қайсар Сұлтанбаев мәлімдеді, деп хабарлайды Azattyq Rýhy.

Сұлтанбаев былтыр «Жол жүрісі туралы» заңға өзгерістер енгізіліп, мопед механикалық көлікке теңестірілгенін еске салды.

«Егер бұрын жол ережесін бұзғаны үшін мопед жүргізушілері Әкімшілік құқықбұзушылық кодексінің 615-бабы бойынша 2 АЕК айыппұлмен жауапкершілікке тартылса, 2025 жылғы 5 сәуірден бастап мопед жүргізушісі механикалық көлік жүргізушілеріне жүктелген жауапкершіліктің барлық спектрін көтереді. Мысалы, бағдаршамның тыйым салу сигналына өткені үшін мопед жүргізушісіне 10 АЕК (ӘҚБтК-нің 599-бабы) айыппұл салынады», - деді ол.

Комитет төрағасы мас күйде мопед жүргізетіндерге баса назар аударды. Оның айтуынша, қазір мопедті масаң күйде басқарғандар Әкімшілік құқықбұзушылық кодексінің 440-бабы бойынша қоғамдық орында мас күйде жүргені үшін жауапты болады және 5 АЕК айыппұл арқалайды.

«Әкімшілік құқықбұзушылық кодексінің 608-бабы бойынша нормалар қабылданғаннан кейін,  мопед жүргізушісі алкогольдік масаң күйде көлік жүргізгені үшін жауапты болады және санкция 15 тәулікке әкімшілік қамаққа алуды және 7 жыл мерзімге көлік басқару құқығынан айыруды көздейді. Сондай-ақ мопедті жүргізу үшін А, А1 немесе В санаты бар жүргізуші куәлігі қажет», - деді Сұлтанбаев.

ІІМ ақпаратынша, бүгінге дейін 23 мыңнан астам мопед тіркеліп, 2 мыңнан аса А және А1 санатты жүргізуші куәлігі берілген.