Алматыдағы жантүршігерлік апат: кішкентай қызға жол бермеген автобус жүргізушісі жауапқа тартылды

Жақында Алматыда жаяу жүргіншілерге арналған жолдан өтіп бара жатқан кішкентай қызды жүк көлігі басып кеткен еді. ІІМ әкімшілік полиция комитетінің төрағасы Қайсар Сұлтанбаев балаға жол бермеген автобус жүргізушісі де жазаланғанын айтты, деп хабарлайды Azattyq Rýhy.

«Расын айту керек, қайтыс болған жасөспірім кәдімгі жүргінші өтетін жолдан өтіп бара жатқан. Оқиға қаланың орталығында емес, шет жағында болған. Алматыны білетін болсаңыз, Айнабұлақ деген шағын аудан бар, сол ауданнан төмен жақта, қаланың шетінде. Ол жақта жүк көліктерінің өтуге құқықтары бар. Жаңағы бала жаяу жүргінші өткелінен өтіп бара жатқанда бір автобус алдынан кесіп өтіп, бала қорқып артқа қарай жүргенде қасында келе жатқан жүк көлігі оны байқамай қалып, басып кетіп отыр. Автобус жүргізушісі  баланы жүргінші өткелінен өткізбегені үшін жауапқа тартылды, бұл факті бойынша қылмыстық іс қозғалды», - деді Сұлтанбаев Орталық коммуникациялар қызметінде өткен брифингте.

Комитет төрағасы қылмыстық іс аясында осы жол апатына қатысты әрбір азаматтың жауапкершілігі қаралатынын атап өтті.  

Сұлтанбаев автобус жүргізушісі балаға жол бермегені үшін әкімшілік жауапқа тартылғанын, қылмыстық іс аясында кейін жүргізушінің жауапкершілігі айқындалатынын нақтылады.