Өткен жылы Қазақстанда 139,5 мың неке тіркеліп, 59,8 мың жұп ажырасты

2019 жылы Қазақстанда 139,5 мың неке тіркеліп, 59,8 мың жұп ажырасты. Бұл туралы Статистика комитеті хабарлады.

Статистика комитетінің мәліметінше, 2019 жылы қиылған некелердің саны 1,2% өсіп, 139,5 мыңды құрады. Оның ішінде 98,2 мыңы (70,4%) неке – қалаларда, 41,3 мыңы (29,6%) ауылдық жерлерде тіркелген. 84,2 пайызы – моноэтникалық, 15,8 пайызы этносаралық некелер. Бірінші рет отбасын құрған ерлер – 81,8 пайыз, ал тұңғыш рет некелескен әйелдер 83,6 пайыз болған.

Алайда, былтыр 2018 жылмен салыстырғанда ажырасу көрсеткіші 9,1% артып, 59,8 мың ажырасуды тіркелген. Ажырасқандардың 73,7 пайызы – қалаларда (44,1 мың), 26,3 пайызы – ауылдық жерлерде (15,7 мың).

Ажырасу көрсеткіші бойынша ең жоғары көрсеткіш Павлодар облысында – 1000 адамға шаққанда 4,24 коэффициент, ең төменгі көрсеткіш Түркістан облысында – 1000 адамға шаққанда 1,76 коэффициент.

Ажырасатындардың дені – ортақ баласы жоқ жұптар (29,6%). 10 жылдан бері некеде тұратын жандар арасындағы ажырасудың жалпы деңгейі 38,5%-ды құраған.