Астанадағы тұңғыш қазақ мектебінің қашан ашылғаны белгілі болды

Осыдан 25 жыл бұрын, яғни, 1999 жылы Астанада тұңғыш қазақ мектебі ашылған еді. Математикадан профессор атағын алған тұңғыш қазақ, Алаш қайраткері Әлімхан Ермековтің атын алған 38 мектеп-лицейі мерейтойын атап өтті, деп хабарлайды Azattyq Rýhy

Астана қаласы білім басқармасының баспасөз қызметі хабарлағандай, мектеп-лицейдің алғашқы директоры Жамал Қасымбек болған. Лицей 3 жыл қатарынан, яғни, 2006, 2007, 2008 жылдары Астана қаласында «Үздік мектеп» номинациясын жеңіп алып, 2011 жылы «Көшбасшы мектеп», 2012 жылы «Үздік мектеп» номинациясын иеленген еді. 2013 жылы Лондондағы Халықаралық BID сапа бойынша конвенция №38 мектепті кемелдіктің бұлжымас сапасының беріктігі үшін «Алтын тәж» IQC жүлдесімен марапатаған мектеп ретінде тарихта өзіндік орны бар.

«Мектептің ширек ғасырлық мерейтойы барысында «Мектебіме ширек ғасыр» естеліктер кітабының тұсаукесері өтті. Мектепішілік «Әлімхан Ермеков» медалі осы мектепте еңбек жолын жас маман болып бастап, 15 жылдан там үзіліссіз еңбек етіп жүрген ұстаздарға табысталды», - деп хабарлайды білім басқармасы.

Айта кетейік, қазір Астанада 189 мектеп бар.