Бас мүфти: «Қадір түнін өз үйіңізде өткізуге шақырамын»
Қазақстан мұсылмандары діни басқармасының төрағасы көпшілікке үндеу жолдады
Наурызбай қажы Тағанұлы көпшілікке жасаған үндеуінде 19 мамыр - Қадір түнін үйде өткізуге шақырды.
«Биылғы Рамазанның қасиетті Қадір кеші мамыр айының 19-нан 20-на қараған түнге сәйкес келіп отыр. 19 мамырда мешіттеріміз таңғы сағат 07:00 мен кешкі 20:00 аралығында жұмыс істейді. Осы ретте баршаңызды Қадір кешін өз үйлеріңізде өткізуге шақырамын. Биылғы Рамазан айы карантин жағдайында өтіп жатқаны өздеріңізге белгілі. Карантин талаптарын орындауымыз тиіс. Бұл – сіз бен біздің, өз отбасымыз бен ең жақын туыстарымыздың денсаулығы мен өмірінің игілігі үшін қабылданған шешім. Мұны түсіністікпен қабылдайсыздар деген үміттемін», - деді ол.
Қазақстан мұсылмандары діни басқармасы қасиетті Қадір кешінде Құран хатым дұғасын, уағыз-насихат пен пайдалы дәрістерді онлайн режимде өткізеді. Үйде отырып, онлайн режимде дұғаға қатысып, насихат тыңдауға толық мүмкіндік бар.
