Қазақстан Ұлттық Олимпиада комитетінің жаңа Бас хатшысы сайланды
Бұған дейін ол қызметті Жанар Өтешева атқарған
Қазақстан Ұлттық Олимпиадалық комитеті Бас Ассамблеясының кезектен тыс жиынында Геннадий Головкин Бас хатшы қызметіне Әлімжан Ақаевтың кандидатурасын ұсынып, ұсынысты қатысушылар бірауыздан бекітті, деп хабарлайды Azattyq Rýhy.
«Бас Ассамблея мүшелеріне маған сенім артып, мен ұсынған кандидатты қолдағаны үшін алғыс айтамын. Әлімжан Ақаевты жаңа қызметке сайлануымен құттықтаймын. Оның жылдар бойы жинаған тәжірибесі мен білімі алға қойылған мақсаттарға жетуге көмектесеріне сенемін», - деді Геннадий Головкин.
Геннадий Головкин спортшылардың Париж Олимпиадасындағы жетістіктеріне тоқталып, жарыс циклінің әлі де жалғасып жатқанын атап өтті. Сондай-ақ, 2028 жылы Лос-Анджелесте өтетін келесі жазғы ойындарға дайындықты қазірден бастау керектігіне назар аударды.
Әлімжан Ақаевтың мемлекеттік басқару магистрі дәрежесі (Дрейк Университеті, Дес Мойнес, Айова штаты, АҚШ), Іскерлік басқару магистрі дәрежесі (Солтүстік Айова магистрі, Седар-Фоллс, Айова штаты, АҚШ), Сыртқы саясат саласындағы Мемлекеттік басқару дипломы (Ресей СІМ Дипломатиялық Академиясы, Мәскеу, РФ) бар.
Ол жеті жыл көлемінде Қазақстан Ұлттық Олимпиадалық комитетінің халықаралық қатынастар Департаментін басқарып, халықаралық форумдар мен конференцияларда Қазақстан Ұлттық ҰОК мүддесін қорғады және Қазақстанның әлемдік спорт аренасындағы байланысы мен беделін нығайту жолында қызмет етті.
2024 жылдың ақпанынан бастап Қазақстан ҰОК президентінің халықаралық мәселелер жөніндегі кеңесшісі қызметін атқарды.
