Бұл жолғы сапарымыз ерекше - қариялардан құралған ансамбль Түркия жұртын тәнті етті

Алматы қаласының Алатау аудандық ардагерлер ансамблі Стамбұлда екі күн концерт беріп, жергілікті жұрттың ықыласына бөленді, деп хабарлайды Azattyq Rýhy.

Ардагерлер ансамблі Түркия мемлекетіне барып, қазақтың ән-күйі өнерін бауырлас халыққа паш етті. 65 жастан асқан қариялардан тұратын өнер ұжымы көрермендерге қазақ халық әндерінен бөлек, түрік, ағылшын, француз тілінде ән шырқап, би биледі. Бұған дейін Америка мен Еуропа елдерінде өнер көрсетіп, түрлі байқауларда жеңімпаз атанып жүрген ұжым Түркияға алғаш рет барып отыр.

«Түркияда бір апта болып қайттық. Осы уақытқа дейін қанша елге сапарлап барып жүрміз, бірақ осы сапар өте ерекше болды. Туысқан бауырларымыздың арасында болып, музейлерін аралап, мәдениетімен таныстық. Еуропаны Сұлтан Сүлеймен патшаның, оның үрім-бұтағының жатқан жерін көрдік. Тарихына қанық болдық. Ұйымдастыру өте жоғары деңгейде болды. Алты мемлекеттің басы қосылған Түрксой ұйымының басшылары сахна ұйымдастырды, сол жерде конуерт бердік. Қазақстанға керемет көңіл-күймен оралдық», - дейді Алатау аудандық ақсақалдар кеңесінің төрағасы Сағатулла Таубалды.

Ашық аспан астында өткен концертке Түркияда тұратын қазақтармен қатар, жергілікті халықтың қарасы көп болып, өнерпаздарға қошамет көрсетті.

Сағатулла Таубалды алдағы уақытқа жоспарлар бар дейді. Айтуынша, ансамбль енді Жеңістің 80 жылдығына дайындықты бастайды.