Астанада дәстүрлі Қысқы қайырымдылық балында би билейтін қыз-жігіттер іріктелді

Астанада мерейтойлық XV Қысқы қайырымдылық балында өнер көрсететін дебютанттар іріктелді, деп хабарлайды Azattyq Rýhy.

«Болашақ» корпоративтік қоры ерекше қажеттіліктері бар балалардың сапалы білім алуы және дарынды жастарды қолдау мәселелеріне жұртшылықтың назарын аудару мақсатында 2012 жылдан бері Қысқы қайырымдылық балын өткізеді. Бұл – Қазақстандағы бизнестің, дипломатиялық корпустың, қоғамдық және саяси топтардың өкілдерін жинайтын өз тарихы бар жалғыз бал.

Биылғы Қысқы қайырымдылық балының дебютанттар кастингіне 300-ге жуық адам қатысқан. Іріктеу екі кезеңнен тұрған. Хореографиялық байқаудан және ұйымдастырушылармен әңгімелесуден сәтті өткен 40 үміткер дебютант атанды. Үш ай бойы олар балда орындайтын әр түрлі кәсіби билерді үйренеді. Дебютанттарды биге Қысқы қайырымдылық балын қоюшы-хореограф, Қазақ ұлттық хореография академиясы хореография факультеті деканының орынбасары, Қазақстан халқы Ассамблеясының жастар ұйымы президиумының мүшесі, ҚР спорттық би федерациялар ассоциациясының төрешісі Евгений Моисеев дайындайды.

«Қысқы қайырымдылық балы – бұл жай ғана мәдени шара емес, бұл біздің қайырымдылық жобаларымызды жүзеге асыруға көптеген қамқор адамдардың, меценаттардың және компаниялардың қосар үлесі. Бал өткізіп келе жатқан он екі жыл ішінде 164-тен астам демеуші мен серіктес тартылып, 900 миллион теңгеден астам қаржы жиналды. Біздің қор аутизм бар және басқа да даму ерекшеліктері бар балалардың мектепте оқып, балабақшаға барып, спортпен айналысып, сондай-ақ кәсіп меңгеруі үшін белсенді жұмыс істеп жатыр. Жыл сайын өткізілетін балдың арқасында біз Қазақстанда және шетелде өтетін шығармашылық байқауларға, зияткерлік және спорттық жарыстарға қатысуға жеткілікті қаражаты жоқ дарынды жастарды қолдаймыз», – деді «Болашақ» корпоративтік қорының директоры Азамат Божақ.

Жиналған қаражат «Болашақ» қорының ерекше қажеттіліктері бар балалар мен дарынды жастарға арналған «Әр бала мектепке баруға лайықты» және «Жол жүру гранттары» қайырымдылық бағдарламаларына бағытталды.

Кастинг «Hilton Astana» қонақ үйі мен «AMANAT» партиясының қолдауымен өткен. Ал XV Қысқы қайырымдылық балы 2024 жылғы 13 желтоқсанда «Hilton Astana» қонақ үйінде өтеді.

Айта кетері, бал қонақтары дебютанттар биі, салтанатты кешкі ас, бағалы лоттар аукционы және ұтыс ойыны болатын ғажайып атмосфераға бөленеді.