«Үш рет жүрегі тоқтады»: Медавиация қызметкерлері 68 жастағы екібастұздықты өлімнен аман алып қалды

Екібастұздан Павлодарға тікұшақпен тасымалдау кезінде пациенттің жүрегі үш рет тоқтап қалған, деп хабарлайды Azattyq Rýhy Павлодар-онлайнға сілтеме жасап.

Облыстық жедел жәрдем станциясында әуеде жүргізілген медициналық авиация мен жансақтау жұмысы туралы баяндалды.

15 тамыз күні Екібастұз қаласынан 68 жастағы пациентті облыстық кардиохирургия орталығына ауыстыруға өтінім түскен. Ер адам жергілікті ауруханаға «ишемиялық жүрек ауруы, толық атриовентрикулярлық блокада» диагнозымен тап болған. Бұл шақыртудың ерекшелігі сол, науқасты тасымалдау үшін оған уақытша кардиостимулятор қойылды.

«Реаниматолог дәрігер бұл тапсырманы орындап, пациентті тікұшаққа отырғызды. Бірақ содан кейін дефибриллятор мониторындағы барлық көрсеткіштер нөлге түсті. Біз жансақтау жұмыстарына кірістік. Ер адамды тірілткендей болғанымызда, оның тынысы тоқтады. Қайтадан жансақтау шараларына жүгінуге тура келді. Жол бойында пациенттің жүрегі үш рет тоқтап қалды. Ұшу жағдайында жүректі «жұмыстату» арнайы жабдықтар мен дәрі-дәрмектер болғанымен де өте қиын. Сондықтан бұл жағдайды нағыз таңғажайып деп атауға болады», - деді медициналық авиацияның аға фельдшері Алия Махамбетова. 

Ер адамды Павлодарға жеткізіп, кардиоорталық мамандарына тапсырды. Мұнда ол бірден жансақтау бөліміне жатқызылды.