Қояндыда әлі күнге дейін 2 мыңға жуық үйдің құжаты жоқ
Жергілікті тұрғындар үшін «Азаматтарға арналған үкімет» уақытша ашылды
Қояндыда 2000-ға жуық үйде әлі күнге дейін құқық белгілейтін құжаттар жоқ. Қордаланған мәселелерді шешуді Ақмола облысының прокурорлары қолға алды, деп хабарлайды Azattyq Rýhy.
Бұған дейін Қоянды ауылының тұрғындары мүлікке құқықтарды ресімдеуге байланысты құжаттарды алу үшін Астана, Көкшетау қалаларына баруға мәжбүр болған. Халыққа қызмет көрсету орталықтарының қашықта болуы азаматтардың наразылығын тудырды.
«Кейбір жағдайларда бұл жылжымайтын мүлікке құқықтардың ұзақ уақыт тіркелмеуіне себеп болды, бұл соңғы су тасқыны кезінде апаттан келтірілген залал үшін өтемақы алу проблемаларына әкелді. Мысалы, 2000-ға жуық үйде әлі күнге дейін құқық белгілейтін құжаттар жоқ», - деп хабарлады прокуратура.
Енді Қоянды ауылының №2 жалпы білім беретін мектебінде «Азаматтарға арналған үкімет» КЕАҚ қызметкерлері уақытша қызмет көрсетеді. Азаматтар жылжымайтын мүлікке құқықтарын жедел тіркей алады.
