«Көз тілігін ғана қалдырып қара киіну – дәстүрімізге қас»: депутат Нұрлан имамға зор қолдау танытты

Мәжіліс депутаты Мұрат Әбенов Нұрлан имамның хиджабқа қатысты пікірін қолдап, имамдарды бұл мәселе жайлы ашық айтуға шақырды, деп хабарлайды Azattyq Ruhy 

«Осылай нақты айтатын имамдар керек.  Мүфтиятқа қатысты имамдардың бәрі (Нұрлан имам сияқты) тек Әбу-Ханифа мазһабын ұстануы керек. Өз-өзін «ұстаз» деп атайтын, түсініксіз ағымдардың өкілі керек емес. Соңғы кезде қазақ ұлтының ежелден келе жатқан анау дәстүрі харам, мынау заты сәйкес келмейді, мына киім дұрыс емес деп араңдататын «уағыз» айтатындар көбейді. «Домбыра тартпа, сәлем салма, келіннің бетін ашпа, тұсау кеспе...» деп халықтың ашуын туғызатын насихатшылар пайда болды», - дейді депутат.

​Оның айтуынша, қазақ Ислам ді­­нінің Әбу-Ханифа мазһабын, яғни Ха­нафи бағытының бұрынғы түркі салт-дәс­түрдің Ислам дініне қайшы келмейтін тұс­тарын сақтап қабылдаған.

«Мысалы, қазақ даласында адам қайтыс болғаннан кейін дүние-мүл­кімен, мінген атымен жерлеу дәстүрі болғанын археологиялық қазбалардан көреміз. Олар Исламға қайшы келгендіктен, осы жерде тұрғандар сол баяғы кездерде ол дәстүрден бас тартқан. Демек, қазақтың осы кез­ге дейінгі орныққан салт-дәстүрлерінің бә­рі дінмен үйлескен, сәйкес келген ұлттық құндылық. Оларды казір ревизия жасап, жоққа шығарудың қажеті жоқ. Бізге Ханафи мәзһабы Ислам құндылықтарын ұлттық салт-дәстүрлермен ұтымды ұштастыра білгені үшін аса маңызды», - дейді ол.

Нұрлан имам радиобағдарлама кезінде қара жамылу, қара киім киіп, көзінің тілігін ғана қалдырып киіну ұлтымызға, салт-дәстүрімізге қарсы екенін айтты.

«Ол бүгініміз бен кешемізге де сыймаған дәстүр. Құдайға деген тақуалығымыз көзіне дейін қап-қара жабумен өлшенбейді. Бетін жабу не шариғаттың бұйрығы емес, ата-абаның да дәстүрі емес. Қара киімге келетін болса, қара киім жамылу қайғының, қасіреттің білдіреді», - дейді Нұрлан имам.