СҚО-да жылу үшін артық төлеген тұтынушыларға қаражаттары кері қайтарылады

2023-2024 жылдардағы өткен жылыту маусымының қорытындысы бойынша жылу есептегіш құралдары жоқ солтүстік қазақстандық тұтынушылар монополистерге 24 миллион теңгеден астам қаржы артық төлеген, деп хабарлайды Azattyq Rýhy Петропавловск.news-ке сілтеме жасап.

Солтүстік Қазақстан облысы бойынша табиғи монополияларды реттеу департаментінің баспасөз қызметі хабарлағандай, орталықтандырылған жылумен қамтамасыз ету қызметтерін пайдаланатын және жылу есептегіш құралдары жоқ тұтынушылар үшін сыртқы ауаның нақты температурасына байланысты жылумен қамтамасыз ету қызметтерінің құнын қайта есептеу жұмыстары жүргізілген. Барлығы 24,1 миллион теңге қайтарылуы тиіс, оның ішінде «Севказэнергосбыт» ЖШС тұтынушыларға 10,8 миллион теңгені қайтаруы қажет.

«Қайта есептеу нәтижелері бойынша қаражатты қайтару тұтынушылардың жеке шотында жаңа жылыту кезеңінде (2024-2025 жылдар) немесе күнтізбелік жыл ішінде (2024 жылдың соңына дейін) аванс (сальдо) түрінде бөлек жолмен көрсетіледі», — деп хабарлады баспасөз қызметі.

Егер келіспеушілік туындаса, субъектілер департаменттің қабылдаған шешімін жоғары тұрған органға немесе сот тәртібімен шағымдануға құқылы.

Сондай-ақ ведомство барлық тұтынушылар жылу есептегіш құралдарын қолдануға көшкен кезде тұтынушы тек нақты тұтынылған жылу энергиясының көлемі үшін ғана төлем жасайтынын атап өтті. Бұл сыртқы ауаның нақты температурасына байланысты қайта есептеуді қажет етпейтінін білдіреді.