«Қолқаны алатын жағымсыз иіс»: Атырау тұрғындары үйлерінен шыға алмай отыр

Атырау тұрғындары үйлерінен шыға алмай отыр.  Мұнда соңғы бір аптада ауа ластанып, жұрттан маза қашқан, деп хабарлайды Azattyq Rýhy Алматы арнасына сілтеме жасап.

Есік-терезе ашудан қалдық, деген жұрт жергілікті биліктен көмек сұрайды. Өйткені, далада жүру мұмкін емес. Қарт кісілердің қан қысымы көтеріліп, естерінен танып жатыр.

Ауаға тараған сасық иіс соңғы аптада тіпті шыдатпай барады. Күнде кешке жағымсыз иістен тіпті ұйықтаудың өзі мұңға айналды деп отыр көпшілік. Соның салдарынан жұрт бетперде киюге мәжбүр. Өйткені, лас ауа тұрғындардың тыныс жолын бітепті.

Аймақта ауаға қалдық бөлетін бірінші санаттағы 100-ден аса кәсіпорын бар. Әсіресе, алпауыт мұнай компанияларының бұл ретте үлесі зор. Ал, экология департаментіндегілер сасық иістің қайдан шыққанын өздері білмейтін болып шықты. Қазір арнайы құрылған топ сынама алып, анықтап жатыр.

«Күнімен-түнімен қарап жатырмыз. Халық иіс мына жақтан шығып жатыр, енді сұрасаң ана жақтан шығып жатыр деп шатасуда. 2-3 күннен соны анықтай алмай жүрміз. Бірақ нақты қай жерден шыққанын әлі таба алмай жатырмыз. Барлық мекемелер бір жерде шоғырланып қалған.Оның қайсынан не шығып, жатқаны бізге белгісіз боп тұр», - дейді Облыстық табиғи ресурстар және табиғатты пайдалануды реттеу басқармасының басшысы Нұрлан Жантоқов.

Қазір әкімдік пен экология департаменті бас аяғы 30 мекемеге тексеріс жүргізіп жатыр. Алайда, әзірге нәтиже жоқ. Ал атыраулықтардың аптап ыстықта қашанға дейін таза ауаға зәру болатыны белгісіз.