Қаңтар оқиғасы: 54 адамды азаптап, жер сүйгізген ҰҚК-нің 11 қызметкері ақталуға тырысты

Алматы қалалық соты Қаңтар оқиғасы кезінде ұсталғандарды азаптады деп айыпталған ҰҚК-нің 11 қызметкерінің апелляциялық шағымын қарады, деп хабарлайды Azattyq Rýhy.

Алқа шешімі бойынша үкім күшінде қалды. Бұл іс бойынша процесс жабық өтті.

Сот алдында 11 күдікті мен 54 жәбірленуші жауап берді.

2022 жылғы 6 қаңтарда ҚР ҰҚК төрағасының бұйрығымен елімізде террористік қауіптің қызыл деңгейі енгізілді және терроризмге қарсы операция режимі белгіленді.

Қауіпсіздік күштеріне қылмыстарды ретке келтіру және жолын кесу үшін кең өкілеттіктер берілді. Тергеу олардың кейбіреулері оны асыра жөнсіз пайдалануға шешім қабылдағанын анықтады.

«Атап айтқанда, ҰҚК Алматы департаментінің 11 лауазымды тұлғасы бұйрығымен (әр түрлі бөлім мен арнайы қызмет басқармаларының бастықтары қатарынан) 6 қаңтар күні таңертең ҚР Қарулы Күштерінің әскери қызметшілері қаланың төменгі бөлігінде ұсталған адамдарды халықаралық әуежай ғимаратына жаппай әкеле бастайды. Ұсталғандарды жаппай тәртіпсіздіктерге, терроризмге және басқа да қылмыстық құқық бұзушылықтарға қатысы бар деп айыптайды», - делінген соттың хабарламасында. 

Олар әуежай аумағында орналасқан контейнерлерге 54 азаматты жеткізіп, аяусыз «жауап алған».

«Тергеу мәліметтері бойынша, ҰҚК қызметкерлері күдіктілерді қорқытып, ұрып-соққан: АК-74 автоматтарын, резеңке таяқшаларды және тіпті бильярд таяғын пайдаланып, ұрған. Адамдарды есін жоғалтқанға дейін ұрып-соғып, тепкілеп, тағылған айыптарды мойындауды талап еткен. Тіпті, бір адамды зорлаймыз деп қорқытқан, ал екіншісіне контейнердің еденін сүйгізіп, жалатқан», - делінген хабарламада. 

Мұның барлығы контейнердегі видеоға жазылып қалған.

Соққыға жығылғандар бір тәулік бойы сусыз, ассыз және медициналық көмексіз, қансырап жатқан. 7 қаңтар күні оларды Алматы қаласы бойынша ІІМ ҚАЖД тергеу изоляторына жапқан.

ҰҚК-нің 11 қызметкеріне ҚР ҚК 146-бабының 3-бөлігі  «Азаптау» бойынша айып тағылды. Олар тергеу изоляторына қамауға алынды.