Путин Ресей азаматтығынан шығарды: Қазақстандағы ең бай әйел Айдан Сүлейменованың қос азаматтығы болған ба
Ол - қазақстандық миллиардердің әйелі
Қазақстандық миллиардер Данияр Әбілғазиннің әйелі Ресей азаматтығынан бас тартуға өтініш білдірген. Бұл туралы РФ президенті Владимир Путиннің азаматтық беру және айыру жайлы жарлығында жазылған, деп хабарлайды Azattyq Rýhy.
Владимир Путин 11 шілдеде Ресей азаматтығын беру және одан айыру туралы Жарлыққа қол қойды.
«Агенттік» басылымы анықтағандай, ресейлік паспорттан бас тартқандардың арасында Қазақстаннан келген кәсіпкер әйел Айдан Сүлейменова да бар.
Ол - еліміздегі ең ірі «Аяла» қайырымдылық қорының негізін қалаушы және елдегі ең табысты әйелдің бірі.
«Ресей Федерациясының азаматтығынан бас тарту туралы келесі тұлғалардың өтініші қанағаттандырылсын: 4) Айдан Төлеутайқызы Сүлейменова 1968 жылы 4 сәуірде Қазақстанда дүниеге келген», - делінген жарлықта.
Айдан Сүлейменова - Қазақстанның бірінші Сыртқы істер министрі Төлеутай Сүлейменовтің қызы және Қазақстанның ең бай және ықпалды кәсіпкерлерінің бірі Данияр Әбілғазиннің әйелі.
2024 жылы Forbes Kazakhstan ең бай адамдар рейтингінде ол 21-ші орынға, ең ықпалдылар рейтингінде 18-ші орынға ие болды.
Сондай-ақ жақында Грекиядағы аралдың өртеуіне байланысы бар деген күдікпен бір топ қазақстандықтың тізімі жарияланған болатын. OCCRP журналистері онда Forbes тізіміндегі қазақстандық кәсіпкер Данияр Әбілғазин мен Әбілғазиннің жұбайы және тағы бірнеше адам болғанын хабарлаған.
Осы оқиғадан кейінг Данияр Әбілғазиннің ұшағы Афинадан Алматыға ұшып кеткен.
Кейінірек Грекия прокуратурасы сегіз қазақстандыққа Гидра аралындағы орманды өртеуге қатысқаны үшін айып тағылғанын хабарлады.
Azattyq Rýhy тілшісі Айдан Сүлейменованың қос азаматтағы болғанына қатысты Ішкі істер министрлігіне сұрау жолдады. ІІМ баспасөз қызметі көші-қон комитеті қызметінен жауап алып жолдайтынын хабарлады. Айта кетейік, Қазақстанда қос азаматтыққа тыйым салынған.
