25-50 мың теңге. Полиция қызметкерлері карантин режимінде де пара алуын тыймай отыр

Сыбайлас жемқорлыққа қарсы іс-қимыл агенттігі бірқатар әкімдіктер мен полиция қызметкерлері төтенше жағдай режимін пайдаланып, пара алып жатқандарын хабарлады.

«Төтенше жағдай уақытында қоғамдық тәртіпті, халықтың өмірін және қауіпсіздігін қамтамасыз етуі тиіс лауазымды тұлғалар осы сәтті пайдакүнемдік мақсатта пайдаланып жатыр. Өткен аптада бірқатар шенділер төтенше жағдай режимінде тәртіп орнатуға сенім артылғанына қарамастан пара алу қылмысына барды», - деп айтты агенттіктің аппарат басшысы Қуаныш Жапақов.

Мысалы, Солтүстік Қазақстан облысында аудандық полиция бөлімі бастығының орынбасары 1 млн 300 мың теңге көлемінде пара алды деген күдікке ілінді. Күдікті сол арқылы төтенше жағдай уақытында тұрғындардың аудан аумағында еркін жүріп-тұруына рұқсат берген.

Сондай-ақ аталған облыстағы оперативтік штабтың мүшелері қала сыртындағы блок-бекеттерден өткісі келген автомокөлік иелерінен 50 мың теңге алған. Қазір Петропавл қаласы әкімдігі қызметкерлеріне қатысты сотқа дейінгі тергеу жүріп жатыр.

Ал, Шымкент қаласында жол полицейі кәсіпкерлердің бірін Жангелдин көшесіндегі блок-бекеттен рұқсат қағазынсыз өткізіп, 25 мың теңге көлемінде пара алған. Ал, қаладағы Қаратау ауданының полиция қызметкері Түркістан қаласының тұрғынын Таскешу бекетінен өткізгені үшін 15 мың теңге талап етіпті.

Абай Сейфулла, Нұр-Сұлтан