«Ұлы дала жорығы – 2024»: екінші кезеңде Алматы қаласы көш бастады

Azattyq Rýhy

Батыс-Қазақстан облысының командасы жарыстан шығып қалды

«Ұлы дала жорығы – 2024»: екінші кезеңде Алматы қаласы көш бастады
Фото: «Ұлы дала жорығы» ұйымдастыру комитеті

20 мамырда «Ұлы дала жорығы» марафон-бәйгесінің екінші кезеңі аяқталды. Таңғы сағат 7.00-де 16 команда Екібастұз қаласы маңынан Павлодар облысы аумағындағы Төртқұдық елдімекеніне аттанды, деп хабарлайды Azattyq Ruhy «Ұлы дала жорығының» ұйымдастыру комитетіне сілтеме жасап.

Ат спорты әуесқойлары мен еліміздің әр өңірлерінің өкілдерін біріктіретін спорт әлеміндегі ерекше оқиға қазақтың көрнекті геолог-ғалымы Қаныш Сәтбаевтың 125 жылдығына арналып отыр.

Жол қашықтығы 500 шақырымды құрайды және бағыт Павлодар, Ақмола облыстарын қамтиды. Марафон 23 мамырда Астанада аяқталады. Жорық бағдарламасына сәйкес, командалар марафон-бәйгенің келесі 100 шақырымын бағындырып, екінші кезеңнің мәресі Төртқұдық елдімекені маңында аяқталды.

«Биыл «Ұлы дала жорығына» еліміздің әр аймағынан келген 6 шабандоздан тұратын арнайы «Рекорд» командасы жасақталды. Оның құрамына нағыз қазақтың Адай, Қостанай, Найман, Жетісу өңірінің Арғымақ жылқылары әдейі енгізіліп отыр. «Рекорд» командасының сап түзеп, жорыққа шығуындағы басты мақсат - нағыз қазақи жылқылардың ел арасында танымалдылығын арттыру, кеңінен насихаттау», - деді «Joryq» федерациясының президенті Бақытжан Тұрлыбеков.

Екінші кезең қорытындысы бойынша Алматы қаласының командасы жеңімпаз атанды. Жетісу облысының шабандоздары мәре сызығына екінші болып жетсе, Маңғыстау облысының командасы үштікке ілікті. Өкінішке қарай, екінші кезеңде Батыс-Қазақстан облысының командасы жарыстан шығып қалды.

Екінші кезеңде Түркістан, Солтүстік Қазақстан, Қостанай мен Абай, Павлодар, Ақмола облыстарынан екі аттан, ШҚО, Жетісу, Қарағанды,  облыстары мен Астана қаласынан бір-бір аттан жарысқа жарамсыз деп танылды. Алматы қаласы, Маңғыстау, Жамбыл облыстары бес атпен жарысқа шығады. Жалпы 21 мамырда 3-кезеңді 15 команда жалғастырады.

100 км:

1. Алматы қаласы - 6 сағ. 46 мин.

2. Жетісу облысы - 6 сағ. 48 мин.

3. Маңғыстау облысы -  6 сағ. 52 мин.

4. Қостанай облысы - 6 сағ. 59 мин.

5. ШҚО - 7 сағ. 03 мин.

6. Жамбыл облысы  - 7 сағ. 27 мин.

7. Қарағанды облысы - 7 сағ. 44 мин.

8. Астана қаласы - 7 сағ. 58 мин.

9. Ақмола облысы - 8 сағ. 04 мин.

10. Түркістан облысы - 9 сағ. 04 мин.

11. Абай облысы  - 9 сағ. 09 мин.

12. Павлодар облысы  - 9 сағ. 42 мин.

13. СҚО - 9 сағ. 45 мин.

14. Ұлытау облысы - 10 сағ. 03 мин.15.  

Айта кетері, алғашқы үш жеңімпаз 5-ші Дүниежүзілік көшпенділер ойындары алдында 3-7 қыркүйек аралығында өтетін халықаралық марафон-бәйгеге қатысуға лицензия алады. Халықаралық кезеңге шет мемлекеттерден кемінде 10 команда қатысады деп күтілуде.

Марафон жұмысына 2 халықаралық және 3 қазақстандық судья, сондай-ақ 2 халықаралық және 3 қазақстандық мал дәрігері қатысып, жоғары стандарттарды сақтау мен жылқылардың денсаулығына қамқорлық жасауға кепілдік береді.

Жобаның басты серіктесі –  ҚР Ұлттық спорт қауымдастығы. 

Қолдау көрсетушілер: «Аманат» партиясы, Павлодар облыстық әкімдігі, ҚР спорт және туризм министрлігі.

Ақпараттық серіктестер: «Қазақстан», «Хабар», «Астана» телеарналары.

Марафон жаңалықтарынан www.joryq.kz ресми сайтынан, әлеуметтік желілерден –  fb - JORYQ, Instagram - joryqofficial, Tik-Tok - JORYQ, youtube – JORYQ хабардар бола аласыз.

 

×
Бұл желілік ресурстың ақпараттық өнімдері 18 жастан асқан адамдарға арналған.