Шымкентте бейтаныс әйелді теуіп, соққыға жыққан ер адамға қатысты үкім өзгеріссіз қалды

Azattyq Rýhy

Сот отырысында ол бейтаныс әйелді не үшін соққыға жыққанын түсіндіріп бере алмаған

Шымкентте бейтаныс әйелді теуіп, соққыға жыққан ер адамға қатысты үкім өзгеріссіз қалды
Фото: istockphoto.com

Шымкентте бейтаныс әйелді теуіп, соққыға жыққан ер адамға қатысты үкім өзгеріссіз қалды, деп хабарлайды Azattyq Rýhy.

Шымкент сотының қылмыстық істер жөніндегі сот алқасы сотталушыға қатысты қылмыстық істі апелляциялық тәртіпте қарады. Бұған дейін бірінші сатыдағы соттың үкімімен ер адам бұзақылық жасағаны үшін Қылмыстық кодекстің 293-бабы 1-бөлігімен кінәлі деп танылып, 1 жылға бас бостандығын шектеуге сотталған болатын.

«Апелляциядағы іс жәбірленуші тараптың жазаны нақты бас бостандығынан айыруға өзгертуді сұраған шағымы бойынша қаралды. Мемлекеттік айыптаушы мен сотталушы үкімді өзгеріссіз қалдыруды сұрады. Аталған қылмыс ауыр емес санатқа жатады. Сотталғанның 3-ші топтағы мүгедектігі бар екені анықталды. Ол шын жүректен өкініп, кінәсін мойындап отыр, бұрын сотталмаған және қылмыстық жауаптылыққа тартылмаған. Осыған байланысты сот алқасы бас бостандығын шектеу сотталғанның түзелуі үшін қажетті және жеткілікті жаза деп санады», - делінген сот мәліметінде.

Оқиға биыл 13 ақпанда болған. Ер кісі Қызылорда облысының 50 жастағы тумасы, 3-топ мүгедегі. Сот отырысында ол бейтаныс әйелді не үшін соққыға жыққанын түсіндіріп бере алмаған. Оқиға кезінде масаң күйде болған.

×
Бұл желілік ресурстың ақпараттық өнімдері 18 жастан асқан адамдарға арналған.