Ақтөбе облысында жол апатынан депутат пен ерлі-зайыпты ұстаздар қаза тапты
Полиция болған оқиға бойынша сотқа дейінгі тергеу жүріп жатқанын хабарлады
Ақтөбе облысындағы тас жолда мәслихат депутаты мен ерлі-зайыпты мұғалімдер көлік апатынан көз жұмды, деп хабаралайды Azattyq Ruhy Мой Город басылымына сілтеме жасап.
Жол апаты 9 мамырда Самара-Шымкент тас жолында, Ырғызға жақындап қалғанда болған.
ВАЗ жеңіл көлігі бір бағытта келе жатқан МАН жүк көлігінің артынан соққан. Салдарынан жеңіл көліктегі 3 адам қаза тапқан.
Анықталғандай, көлікті Ырғыз мектебінде дене шынықтыру пәнінен сабақ берген 45 жастағы мұғалім жүргізген. Ол ауруханаға түскен соң көз жұмған. Оның әйелі оқиға орнында қайтыс болды. Әйел де сол мектепте бастауыш сыныптың мұғалімі болып жұмыс істеген. Олардың артында мектеп жасындағы 3 бала қалды. Қаза тапқан үшінші жолаушы Ырғыз ауданы мәслихатының 28 жастағы депутаты, ауданның ветеринар дәрігері болған.
Ақтөбе облысының полиция департаменті болған оқиға бойынша сотқа дейінгі тергеу жүріп жатқанын хабарлады.
