Қостанайда жалған турагент қазақстандықтарды 78 миллион теңгеге алдап кеткен

Қостанайлық турагент 70 адамды 78 миллион теңгеге алдап кеткен. Алаяқ келіншекке екі немесе одан да көп адамға қатысты бірнеше рет ірі көлемде алаяқтық жасады деген айып тағылды, деп хабарлайды Azattyq Ruhy.

Сот үкіміне сәйкес, турагент 2021 жылдың ортасынан бастап өзінің жеке кәсіпкерлігі арқылы келісім-шарттық қарым-қатынаста жұмыс істеп тұрған туроператорлардың турпакеттерін сатумен айналысқан.

«2022 жылдың маусымынан 2023 жылдың маусымына дейін ол турагенттің атын жамылып, азаматтарға туристік пакеттер ұсынған. Іс жүзінде ол Жапония, БАӘ, Түркия, Дубай, Египет, Таиланд, Вьетнам және басқа елдерге бару үшін төленген жәбірленушілердің ақшасын жымқырған», - делінген Жоғарғы соттың хабарламасында.

Іс бойынша жәбірленушілер туристік сапарларды алдын ала толық төлеген.

Ол азаматтардан алған қаражатын толығымен қалтасына басқан. Көптеген жәбірленушілер бұл туралы шындықты тек ұшып шыққан күні немесе әуежайда білген.

«Кейбір жәбірленушілерге сенім білдіру үшін жалған турагент қайтарға билетін төлемей, тек бір жақтағы рейстер мен тұру ақысын төлеген. Түркияға келген бір отбасы олардың тұруы мен қайту рейсінің ақысы төленбегенін біліп қалған. Тергеу амалдары жүргізіліп жатқан кезде екі азаматты алдап үлгерген, оның бірі - сыныптасы», - делінген хабарламада.

Оның қылмыстық әрекетінің салдарынан 70-ке жуық жәбірленушіге 78 миллион теңгеден астам ірі көлемдегі материалдық шығын келтірілген.

Турагенттің кінәсі жәбірленушілердің, куәлардың айғақтарымен, банк шотынан үзінді көшірмелермен, сондай-ақ басқа да іс материалдарымен дәлелденді.

Жалған турагент өз кінәсін толық мойындап, жасаған қылмысына өкініп, жәбірленушілерге өтемақы төлеуге уәде берді.

«Жасалған іс-әрекеттің жеке басын, сипаты мен қоғамдық қауіптілік дәрежесін, істің барлық мән-жайларын, жәбірленушілерге өтелмеген зиянның болуын ескере отырып, сот алаяқтық жасаған әйелді туризм саласындағы қызметпен 6 жылға айналысу құқығынан айыра отырып, 4 жылға бас бостандығынан айыру туралы үкім шығарды», - делінген хабарламада.

Үкім заңды күшіне енген жоқ.