СҚО-да есірткі таратумен айналысқан жас жастағы жігіт 15 жылға сотталуы мүмкін

Есірткі сатушылар оңай жолмен ақша табуды уәде етіп, жастарды есірткі таратуға тартады. Бейхабар жастар бұған сеніп, қомақты ақша табамыз деп ойлайды. Бірақ бұл мүмкін емес. Солтүстікқазақстандық полицейлер осындай жолға түсіп, есірткі өткізген 23 жастағы күдіктіні ұстады. Тәртіп сақшыларының мәліметінше, ол интернет-дүкенде тек бір апта ғана жұмыс істеп үлгерген, деп хабарлайды AzattyqRuhy ІІМ баспасөз қызметіне сілтеме жасап.

Полицейлер жас жігітті қаңтар айында Петропавлдағы көлікжай кооперативтерінің бірінде ұстады. Белла есімді қызметтік-іздестіру итін қолдану арқылы жігіттен ақ түсті ұнтақ тәрізді зат салынған 25 түйіншек табылып, тәркіленді. Сараптама нәтижесі тәркіленген заттың жалпы салмағы 28,12 грамды құраған мефедрон деп аталатын синтетикалық есірткі екенін көрсетті.

«Қолымыздағы ақпаратқа сәйкес, күдікті облыс орталығындағы есірткі сатумен айналысатын интернет-дүкенде есірткі жасырушы болып жұмыс істеу үшін аудандардың бірінен келген. Алайда оның қылмыстық әрекеті бір аптаға ғана созылды. Енді аса ірі мөлшерде есірткі өткізгені үшін ол 10 жылдан 15 жылға дейінгі мерзімге бас бостандығынан айырылуы мүмкін», – дейді СҚО ПД есірткі қылмысына қарсы іс-қимыл басқармасының бастығы Руслан Сапаров.