Қошке Кемеңгеровтің немересі 10 жыл бойы балаларымен ағаш отырғызып келеді

Қазағымызда «Атадан мал қалғанша, тал қалсын» деген жақсы сөз бар. Расымен де саялы ағаш егіп, балаға мирас болатын бұл дәстүр осы уақытқа дейін өз өміршеңдігін жойған емес. Осы мақсатқа орай Қосшыда «Таза Қазақстан» республикалық акциясы аясында асылдың сынығы Ризабек Кемеңгеровтің отбасы мен «Мерейлі отбасы» ұлттық конкурсының Ақмола облысы бойынша жеңімпазы Қазанғаповтар әулеті ағаштар отырғызылды, деп хабарлайды Azattyq Ruhy.

Қосшы қаласында тұратын Алаш қайраткері, ғалым, драматург, жазушы, журналист Қошке Кемеңгеровтің немересі Ризабек ақсақал балаларымен және немерелерімен бірге өзі тұратын үйінің айналысынла ағаштар отырғызды.

«Бүгін үйдің қасында тал егіп жатырмыз. Атадан қалған жақсы сөз бар ғой, «мал қалғанша тал қалсын» деген. Сол ұлы дәстүрдің жалғасы ретінде немерелерімізбен бірге ағаш отырғызып, республикалық акцияға өз үлесімізді қосып жатырмыз. Он жылдан бері жыл сайын үйдің айналысына ағаш егеміз. Соны балаларыммен және немерелеріммен бірге қарап, суарамыз. Қазақ елі өсіп-өркендей берсін!», - дейді Ризабек Кемеңгеров.

Әулеттің ұйытқысы Ризабек ақсақал ұрпаққа үлгі көрсетіп, бата берді. Ол елдің таза болуына сол елде өмір сүретін барлық адам жауапты дейді.

Сонымен қатар 2023 жылғы «Мерейлі отбасы» ұлттық конкурсының Ақмола облысы бойынша жеңімпазы Қазанғаповтар әулеті Қосшы қаласындағы №2 орта мектептің ауласына жеміс ағаштарын егіп, өзгелерге жақсы өнеге көрсетті.

«Бір тал кессең он тал ек», «Қиямет басталып жатса, қолыңда тал болса соны отырғызып үлгер» дейді. Діни тұрғыдан да, адами тұрғыдан да тал егудің сауабы шексіз. Қосшы жас қала, сол жас қаламызды жасыл қалаға айналдыруымыз керек. Сол үшін қазір қалада тұратын 100 мың адам, әр отбасы бала-шағасымен 5 түп ағаштан ексе, қаламыз екі-үш жылдың ішінде жайқалып, жасылданып кететін болады», - дейді Ыбырай Қазанғапов.

Айта кетсек, бір ай бойы жалғасатын «Таза Қазақстан»  ауқымды акциясына әрбір қосшылық үлестерін қосуда. Оған қаланың белсенді азаматтары, қоғам қайраткерлері, танымал тұлғалар ағаш отырғызуды насихаттап, тазалыққа үлес қосуға шақыруда. Бұл бағыттағы шаралар ертең де жалғасын табатын болады.