Көктем мен жаз айларында ауа райы қандай болады
Каспийдің оңтүстігінен және Ресейдің еуропалық аумағынан келетін циклондардың әсерінен жауын-шашын мол жауады
![Көктем мен жаз айларында ауа райы қандай болады](https://azattyq-ruhy.kz/cache/imagine/main_page_full/uploads/news/2024/04/02/660bf4523495e658768541.jpg)
Синоптиктер көктем мен жаз айларына арналған ауа райы болжамын ұсынды, деп хабарлайды Azattyq Ruhy.
«Қазгидромет» РМК баспасөз қызметінің хабарлауынша, сәуір және мамыр айларында елдің көп бөлігінде орташа ауа температурасы нормадан 1°жоғары болады деп күтілуде. Сәуір айында жауын-шашын мөлшері республика аумағының көп бөлігінде нормадан жоғары, ал мамыр айында климаттық нормаға сай деп болжанады.
Көктемде ауа-райы құбылмалы болады. Каспийдің оңтүстігінен және Ресейдің еуропалық аумағынан келетін циклондардың әсерінен жауын-шашын мол жауады, жаңбыр мен қара аралас жаңбыр күтіледі. Оңтүстік аймақтарда суық ауа массаларының ағынынан үсік жүруі мүмкін.
Маусым айында орташа ауа температурасы республиканың көп бөлігінде нормадан 1-2° жоғары болады деп болжанып отыр. Шілдеде, тамызда Қазақстанда орташа ауа температурасы нормаға сәйкес, тек тамызда елдің оңтүстігі мен оңтүстік-шығысында – нормадан 1°жоғары болады деп күтілуде. Маусым айында алдын ала болжам бойынша Қазақстанның басым бөлігінде жауын-шашын мөлшері нормадан аз күтілсе, шілде және тамыз айларында көптеген облыстарда жауын – шашын мөлшері нормаға жақын және одан да артық деп болжанады. Шілдеде елдің оңтүстік – батысында және оңтүстігінде, тамызда – орталықта, оңтүстік, оңтүстік-шығыста жауын-шашын мөлшері нормадан аз болады.