«Көмек көрсетуді бір дорбамен бастадым»: ауыл волонтерінің қайырымды ісі

Талғар ауданы Еламан ауылындағы №41 орта мектеп мұғалімі Ерлік Тілеубай волонтерлікпен 8 жылдан бері айналысып келеді. Ол бұл саладағы қызметі мен игі іс-шаралар жайлы айтып берді, деп хабарлайды Azattyq Ruhy.

Ерлік Алматы қаласында Тұрар Рысқұлов атындағы университетте оқытушы қызметін атқарып жүрген жерінен 2017 жылы Талғар ауданы Еламан ауылындағы №41 орта мектепке мұғалім болып ауысқан екен. 

«Сол жылдан бастап ауылдағы оқушылардың тұрмыс жағдайымен таныса бастадым. 2017 жылдың 1 қыркүйегінен бастап ауылымыздағы толық емес отбасылар, жартылай жетім, ДЦП, көпбалалы отбасылардың жағдайын көре тұра көз жұма алмадым. Қолдан келгенше өз қаражатымнан көмектесе бастадым. Ол кезде волонтер деген сөзді де білмеппін», - дейді ауыл волонтері.

Ол өзін ешкімнің волонтер бол деп насихаттамағанын айтты.Тек жағдайы нашар, көмекке мұқтаж, қаладан алыс, әкімдіктен ұзақ уақыт көмек күткен отбасыларды көргенде тыныш жүре алмай, бірден көмек қолын созуға шешім қабылдаған. 

«Кішігірім бір дорбамен бастадым. Ішінде қант, күріш болды. Алдымен қалада еңбек етіп, кейін ауылда қайырымды іспен айналыса бастадым. Жұрттың маған берген батасы жеткілікті, сол батасы шығар, жаман болған жоқпын, ұлым мен қыздарым дүниеге келді. Қайырымдылық жасауға кіріскенде қажетті заттарды да таптым.  Демеушілік көмек сұрау үшін де құжаттармен дәлелдеу керек. Олардың алдына мұқтаж жандарды да ертіп барған күндерім болды», - дейді ол.

Ол ерікті болу кез келген адамның қолынан келетінін айтады. Себебі,ерікті болу үшін бай-қуатты, қалта тола ақша болудың қажеті шамалы, тек халқыңа, үлкендерге көмек көрсету деген ниет болса жеткілікті. 

«Ерікті болу - ерлік! Басқа адамға көмектесу үшін мықты немесе бай болудың қажеті жоқ, тек мейірімді болу жеткілікті. Ал қоғамда олардың орны ерекше. Себебі волонтер жасаған жақсылығы үшін өтемақы немесе материалдық қажеттілік талап етпейді. Тағдыр тәлкегіне түскен адамдарға көмек қолын созады», - дейді ол.

Еріктілікпен біраз жылдан бері айналысып келе жатқан Ерлік 2017 жылы «Әділ қайырымдылық қоры» ұйымымен бірлесіп Талғар ауданы Еламан ауылындағы №41 орта мектепте оқитын жағдайы төмен отбасылардың балаларына 1 млн 200 мың теңгеге қыстық киім мен аяқ киім алып берген. Осылайша, 60 баланы толықтай қыстық киіммен қамтамасыз етіпті. 

Сондай-ақ «Әділ қайырымдылық қоры» Талғар ауданы Жалқамыс ауылында орналасқан №15 орта мектептегі инклюзивті балалар мен жартылай жетім, ДЦП оқушыларына, барлығы 36 оқушыға жаңажылдық мерекеге орай сыйлық таратқан.

«Әділ қайырымдылық қоры» ұйымымен бірлесіп Еламан ауылының 27 оқушысына Жаңа жылға сыйлықтар тарттық. Сонымен қатар Талғардағы көмір базасымен келіссөз жүргізіп, Тереңқара, Жалқамыс, Еламан ауылдарында  тұратын жағдайы төмен отбасыларға 2 тоннадан көмір таратылды. 30 тонна көмірді 15 уйге  таратып, ризашылығын алған кездер де болды», - дейді Ерлік Тілеубай.

Еріктінің айтуынша, «Қарлығаш қайырымдылық қоры» арқылы Талғар ауданына қарасты Сақтан, Тереңқара, Жалқамыс, Еламан ауылдарында тұратын жағдайы төмен отбасыларға, әсіресе көпбалалы отбасыларға азық-түлік таратылды. 30 отбасы осындай көмекке ие болған.

«2020-2021-2022 жылдары коронавирус кезінде ірі гипермаркет басшыларына шығып, аулымыздың жағдайы төмен отбасыларына азық -түлік  қорабын беруді ұйымдастырдық. Ораза айында 150-100 қорап Сақтан, Тереңқара, Жалқамыс, Еламан ауылдарында таратылады. 2022-2023 жылдары  «Қазақстан жүрегі» қайырымдылық қорының көмегі арқасында Байсерке, Сақтан, Тереңқара, Жалқамыс, Еламан ауылында  оқитын 150-200 оқушыға  жаңажылдық сыйлық таратылды. 2024 жаңа жылында Талғар қаласында орналасқан Жетімдер үйіндегі 100 балаға 100 жаңажылдық сыйлық таратылды. Осы орайда демеуші болған Асқар мырзаға алғыс айтқым келеді», - дейді Ерлік Тілеубай.

Ол волонтерлік патриотизмнің бір көрінісі екенін айтады. Мемлекет басшысы да, «Бұл – көптеген адамның саналы түрде таңдаған өмір салты. Қайырымдылық – адамның бала кезінен бойға сіңетін қасиеті. Сондықтан өскелең ұрпақты жастайынан жақсылық жасауға тәрбиелеу – өте маңызды міндет» деген еді еріктілерді қолдап.  

«Еріктілер ең алдымен, ел игілігіне қызмет етеді. Олардың жұмысы азаматтық қоғамды одан әрі дамытуға мүмкіндік береді. Волонтерлік дегеніміз - бір жеңнен қол, бір жағадан бас шығарып әрекет ету», - дейді ерікті.

Сондай-ақ Ерлік Тілеубай есіне түскен оқиға жайлы айтып берді. Айтуынша, кейде адамдар өздеріне көмектің берілетініне сенбейді. 

«Волонтер болып жүріп аяқасты бір кісіні көріп қалдым, қолында церебралды паралич диагнозындағы баласы бар екен. Шамасы баласы 13-те, содан амандасып қал-жағдайын сұрадым, ол кісі мені менсінбей, сөйлескісі де келмеді. «Баланың арбасы қайда, бар ма?» деп едім, «жоқ» деп жауап қайтарды. Арбаны 2 сағатта  тауып үйіне алып барғанда таңғалып, риза болды. Айтуынша, әкімдікке арбаға сұраныс жазғанына 2 жыл болған екен. 2 жыл күткен арбаны мен 2 сағатта апарып бердім», - дейді волонтер.

Ол көпбалалы ананың баласына Түркиядағы конкурсқа демеушіліктің арқасында қаражат жинап берген. Ол бала Түркиядан Гран-при жүлдегері атанып келген.

Ерліктің айтуынша, ауылда да еріктілерге жұмыс жетіп артылады.

«Ауыл арасында да мұқтаж жандар баршылық. Оларға қол ұшын беріп, қолғабыс көрсетеміз. Әлеуметтік желіде хайп қумай, танымалдылық іздемей, тыныш қана ауылдағы адамдарға қол ұшымды беруді жөн көрдім», - дейді ауыл еріктісі.

Оның айтуынша, жергілікті мемлекеттік органдар адамдарды ерікті болуға ынталанадыру керек. 

«Ерікті болғаныма 8 жыл болды. Осы уақыт ішінде ауылдағы жергілікті билік өкілдері ауыл азаматтарының жұмыла көтерген істерін ескермеді. Ауыл әкімі көрмегендей отыра береді.  Бұл барлық адамға ортақ іс болғандықтан, әкімдіктер де өз үлестерін қосып, жаңадан адамдар тартып, барша жанға құрметпен қарауы керек деп ойлаймын», - деді ол.