Алматыда бір аурухананың 110 қызметкері коронавирус жұқтырған

Соңғы бір тәулік ішінде Алматы қаласында 174 адамның коронавирус жұқтырғаны анықталды. Оның ішінде 116 науқас – әртүрлі медицина мекемелерінде істейтін қызметкерлер, 58-і – науқастармен байланыста болғандар. Жалпы, қала аумағында COVID-19 инфекциянын жұқтырғандар саны 34-ға жетті. Алматы қаласы Қоғамдық денсаулық сақтау басқармасының басшысы Тілеухан Әбілдаевтың айтуынша, емделушілердің арасында 6 бала мен 3 жүкті әйел бар.

«Балаларға арналған қалалық клиникалық жұқпалы аурулар ауруханасының 1 қызметкері, орталық қалалық клиникалық ауруханадағы 110 медицина қызметкері, жедел жәрдем қызметінің 2 маманы және №32 қалалық емхананың 1 қызметкері, №11 қалалық емхананың 1 қызметкері, №1 қалалық клиникалық аурухананың 1 қызметкері бар», - деді басқарма басшысы соңғы бір тәулікте анықталған жағдайды баяндап.

Инфекциялық стационарларда коронавируспен күресіп жатқан 295 пациент бар. Олардың ішінде 7 науқастың жағдайы ауыр. Тағы 41 науқастың жай-күйі орташа ауыр, 247 адамның жағдайы қанағаттанарлық екен. Дәрігерлер вирусты пациенттерден және шұғыл көмек көрсету кезінде жұқтыруы мүмкін.

«Провизорлық орталықтарда 256 адам бар: оның ішінде – 12 бала, карантиндік оқшаулауда – 366, үй карантинінде – 7097 адам жатыр. Коронавирус жұқтырған екі медицина қызметкерінің жағдайы ауыр, қалғандарының жай-күйі қанағаттандырарлық. Байланыста болғандарды анықтау бойынша жұмыс жүргізілуде», - деді ол.

Медицина қызметкерлерінің арасында қауіпті індет жұқтырғандар саны күрт өскендіктен, қаладағы барлық клиникалардың қызметкерлері міндетті түрде тексеруден өткізіледі.

Әмірболат Құсайынұлы, Алматы