Лудомания және есірткіге тәуелділікпен күресте жүйелілік жоқ – Аймағамбетов

Мәжіліс депутаты, AMANAT партиясы фракциясының депутаты Асхат Аймағамбетов Денсаулық сақтау министрлігінің алқа отырысында лудомандар саны артып отырғанын айтты, деп хабарлайды Azattyq Ruhy.

«Қазір лудомания, ішімдік пен нашаға тәуелділік мәселесі өзекті болып отыр. Осындай әлеуметтік маңызы бар дертпен күресте жүйелелік жоқ. Әсіресе, лудомания бойынша. Біздің ойымызша, емдеудің заманауи клиникалық хаттамалары болуы керек. Біз МӘМС немесе МКБЗК бойынша жеке қаржылдандыру қарастыру керек деп ойлаймыз. Себебі лудомандар саны артып жатыр. Ішімдік пен есірткіге тәуелділер де көбейіп жатыр. Осы орайда денсаулық сақтау тарапы жағынан оларға сапалы, қолжетімді және құпиялықты қамтамасыз ету керек. Қажет болса, жеке секторды тартып оларға мемлекеттік тапсырыс беруге болады. Жеке сектордың бұл жерде өз бағыты бар. Бірақ лудомания, ішімдік пен есірткіге қарсы күрес біздің басым бағытымыз болуы керек», - деді Аймағамбетов.

Депутат атағандай, Президенттің тапсырмасы бойынша билогиялық қауіпсіздік заңы қабылданды.

«Бір пандемиядан өттік. ДДСҰ мен өзге сарапшылар пандемия жаңа жағдайдағы қалыпты дүние деп айтады. Сондықтан бізге одан әрі дайындалып, биологиялық қауіпсіздікті қамтамасыз етуіміз керек. Бұл - қажетті штамдар мен зерттеулер, базалар. Бұл орайда министрліктің нақты жоспары бар деп ойлаймын», - деді депутат.

Авторы: Аягөз ҚҰРМАШ