Аймағамбетов медициналық ұйымдардың коммуналдық шығынын әкімдіктерге тапсыруды ұсынды
Ол тариф бойынша рентабельділік әр өңірде әртүрлі екенін айтты
Мәжіліс депутаты, «AMANAT» партиясы фракциясының депутаты Асхат Аймағамбетов Денсаулық сақтау министрлігінің алқа отырысында медицина ұйымдарының коммуналдық шығынын әкімдіктерге беруді ұсынды, деп хабарлайды Azattyq Ruhy.
«Ел бойынша медициналық қызметке тариф бірдей. Алайда өңірлерге қарай рентабельділік әртүрлі. СҚО, Қарағандыда қыс өте ұзақ. Коммуналдық өсім де әртүрлі. Бірақ тариф бірдей. Сондықтан Семейдегі аурухана мен Түркістандағы аурухананың рентабелділігі әртүрлі болады. Сондықтан бізге осы жерде бір тетікті табу керек. Бізге коммуналдық шығынды нормативтен шығарып, жергілікті орган немесе жеке әдіс арқылы қаржыландыру керек. Әйтпесе, бізде ешқандай әділдік болмайды», - деді Аймағамбетов.
Депутаттың айтуынша, бұл мәселе бойынша жеке медицина қызметкерлері жауапты болып отыр.
«Коммуналдық қызмет қаңтар айынан бастап айтарлықтай өсті. Бұл жағдайдан біздің медициналық ұйымдар қалай шығады екен деп алаңдаймын. Кей жерде 50 пайызға дейін, кейбіреуінде одан да жоғары. Қазір олар медициналық құрылғыларды қайта қалай қолданады. Ертең медициналық қызметкерлерді айыптамай ма? Бұл аз қаржыландырудың себебінен болып отыр. Барлық қысым медициналық ұйымдарға түседі. Бұл жерде нақты медицина қызметкерінің жеке жауапкершілігі болып отыр», - деді ол.
Авторы: Аягөз ҚҰРМАШ
