ШұғылЖелтоқсан-қаңтар айларында Қазақстанда карантин күшейтілуі мүмкін

Түркістан облысында мұғалімдерді маска тігуге мәжбүрлеген

Әр мұғалім күніне 600 маска тігуі тиіс деген бұйрық түскен 

Түркістан облысының Сайрам ауданындағы мектеп мұғалімдерін маска тігуге мәжбүрлеген. Бұл туралы «Nur Otan» партиясының Бақылау комиссиясы ұйымдастырған тексеру барысында белгілі болды.

«Вирустың таралуына байланысты мұғалімдерді маска тігуге мәжбүрлеп жатыр. Оған уақытың мен тігін машинаңның бар-жоғына қарамай, әр мұғалім күніне 600 маска тігуі тиіс. Ол аздай, бұған бағынбағандар 15 000 теңге көлемінде ақшалай төлейді деп біздерді қорқытады. Бұл қаншалықты заңды? Осы мәселені тексеріп, мұғалімдерді қорқытып-үркітуден қорғауды өтінеміз. Мұғалімдер мұндай жайттарды дәлелдей алмайтын болғандықтан, бұл туралы ашық айтуға қорқады», - деп жазды «Қазақстандық шағым кітабы» сайтында ұстаздардың бірі. (https://zhalobakz.com/id/69586).

Хабарламаны «Nur Otan» партиясының шұғыл мониторингі байқап қалған болатын. Партияның Сайрам аудандық Саяси кеңесі бюросының қаулысымен, Сайрам ауданы әкімінің орынбасары М.Оразалиев пен аудандық білім беру бөлімінің басшысы К.Шадиев партиялық жауапкершілікке тартылды. Аудан басшылығына келешекте осындай тәртіпбұзушылыққа жол берілмеу керек екені ескертілді.

Партияның баспасөз қызметінің ақпаратына жүгінсек, әлеуметтік желілердегі мониторинг қорытындысы бойынша Қызылорда облысы Шиелі ауданы «Төңкеріс» ауыл аймағының әкіміне байланысты шағым тіркелген. Коронавирус инфекциясының таралуына жол бермеу мақсатында мемлекетімізде шектеу шаралары енгізілгеніне қарамастан, А.Нұрманов еліміздегі  енгізілген Төтенше жағдайдың талабын орындамай үйлену тойына қатысқан.

«Жүргізілген тексерістердің қорытындысы бойынша лауазымды тұлға партиялық жауапкершілікке тартылып, оны аудандық филиалдың саяси кеңесінің құрамынан шығару мәселесі қойылды. Сонымен бірге, аудандық партиялық бақылау комиссиясы төрағасының А.Нұрмановты қызметінен босату туралы ұсынысы қолдау тапты», - делінген партия таратқан хабарламада.

«Nur Otan» партиясы Төрағасының Бірінші орынбасары Бауыржан Байбектің Мемлекет басшысы Қасым-Жомарт Тоқаевтың тапсырмасына орай азаматтардың қоғамдық қабылдаулардағы арыз-шағымдарына байланысты, «Nur Otan» партиясының өңірлердегі партиялық бақылау комиссиясы мен сыбайлас жемқорлық бойынша қоғамдық кеңестері жұмысының күшейтілгенін хабарлағанын атап өткіміз келеді.

Азаматтардың арыз-шағымдарына шұғыл жауап беру үшін «Nur Otan» партиясының қоғамдық қабылдауларының Call-орталықтары мен онлайн-сервистері күшейтілген форматқа көшірілді. Азаматтардың еңбек, әлеуметтік және басқа да құқықтарын қорғау, сондай-ақ, жұмыс берушілердің карантин мезгіліне байланысты ұсынылған жұмыс форматын сақтау мәселелері партиялық бақылауға алынды.

Call-центр: 8 800 080 44 41

Электрондық почта: komek@nurotan.kz

WhatsApp: 8 700 800 44 41

Facebook: https://www.facebook.com/profile.php?id=100034706720426

Instagram: https://www.instagram.com/halykkakomek/