Ішкі туризм: ел ішіне саяхат жасаған отандастарымыз саны 3 млн-нан асты

Туризм және спорт министрі Ермек Маржықпаев биылғы бірінші жартыжылдықта ел ішінде саяхат жасаған отандастарымыздың саны 3 миллионнан асып, былтырғы сәйкес кезеңмен салыстырғанда 400 мың адамға көп екенін, сондай-ақ шетелдік туристердің саны екі есе өскенін мәлімдеді, деп хабарлайды Azattyq Ruhy.

«Қаңтар-маусым айларында елімізге шетелден 500 мыңнан астам турист  келген. Жыл соңына дейін бұл көрсеткіш 1,4 млн адамға жетеді деп жоспарлап отырмыз. Еліміздегі орналастыру объектілерінің иелері туристер санының артуымен алты айда шамамен 100 миллиард теңге көлемінде табыс тапты. Бұл өткен жылғы сәйкес кезеңмен салыстырғанда 30 миллиардқа көп», – деп атап өтті министр Үкімет басшысының алдында жасаған мәлімдемесінде.

Ермек Маржықпаев биылғы 9 айда туризмге 404,8 млрд теңге көлемінде инвестиция тартылғанын, инвестициялар бойынша жылдық жоспарға қол жеткізу үшін барлық өңір жұмысты жандандырып, іске асырылып жатқан әрбір жобаны жергілікті әкімдер жеке бақылауына алуы қажет екенін жеткізді.

2022 жылы кәсіпкерлерді ынталандыруға бағытталған мемлекеттік қолдаудың жаңа шаралары енгізілген болатын. Ал биылдан бастап мемлекеттік қолдаудың барлық шаралары бойынша оң динамика байқалады.  Мәселен 2022 жылы 104,4 млн теңгеге пилоттық қолдау шаралары көрсетілсе, бүгінгі таңда жалпы сомасы 600 млн теңгеден астам өтінімдер мақұлданды.

«Осы орайда Kids Go Free бағдарламасына ерекше тоқталып өткім келеді. Жоба іске асырылған екі жылға жуық уақыт ішінде бағдарламаның игілігін 1500 отбасы пайдаланып, 3,2 мың бала ел ішінде тегін саяхаттады. Жыл соңына дейін тағы 1 мың баланы қамту жоспарланып отыр. Жобаны мұғалімдердің қадағалауымен жүретін мектептегі топтық турларға тарату бойынша жұмыстар жүргізіліп жатыр. Сондай-ақ министрлікпен шаруа және фермер қожалықтарына ауыл шаруашылығы мақсатындағы жерлерде қонақ үй салуға мүмкіндік беру мәселесін де қарастырып жатырмыз. Бұл шара ауылдық жерлерде жұмыспен қамтуды ұлғайтуға ықпал ететеді», – деді сала басшысы.

Үкіметтің тапсырмасы бойынша биыл туризмнің басым бағыттар тізімі ТОП-10-нан 20-ға дейін кеңейтілді. Осылайша, әр өңірде дамытылатын ең перспективалы нүктелер анықталды. Жаңа тізімге Шығыс Қазақстандағы Катонқарағай, Атырау облысындағы Сарайшық қалашығы, Ұлытау облысы және тағы басқа өңірлер кіреді.
 
Министрлік алдағы уақытта шетелдік туристерге ыңғайлы болуы үшін шекарада QR-кодтар енгізу, туристік тартымдылыққа сүйене отырып, өңірлер рейтингі бойынша цифрлы платформаны әзірлеу, білікті гидтердің бірыңғай ақпараттық базасын құру, яғни гидтердің қызметін цифрландыру және инфрақұрылымды дамыту, жүйелі шаралармен қатар кадрлық әлеуетті де арттыру бойынша жұмыстар атқарады.