Қарапайым халық барлық жүргізіліп жатқан реформалардың жемісін сезінуі керек – сарапшы

Қазақстан жаңа саяси дәуірге қадам басып, бір жарым жылдың ішінде билік тармақтары толығымен жаңғырды. Еліміз суперпрезиденттік басқарудан ықпалды Парламенті бар Президенттік республика моделіне көшті. Яғни, «Күшті Президент – ықпалды Парламент – есеп беретін Үкімет» тұжырымдамасы барынша орнықты. Бұл туралы саяси сарапшы Ерлан Ахмеди айтты, деп хабарлайды Azattyq Ruhy.

Оның айтуынша, ендігі кезекте еліміздегі саяси жаңғыру экономикалық өзгерістерге ұласуда. Яғни, халықтың әл ауқатын көтеру басым бағыт болмақ.

«Күні кеше Президент Қ. Тоқаев жариялаған Жолдау Қазақстанның жаңа экономикалық бағдарын айқындап берді. Мемлекет басшысы өз сөзінде «әділдік, инклюзивтік және үнемшілдік жаңа экономикалық бағдардың өзегіне айналатынын» атап өткен болатын. Нағыз қарыштап дамып келе жатқан ел боламыз десек, қарапайым халық барлық жүргізіліп жатқан реформалардың жемісін сезінуі керек. Қазіргі таңда азаматтарымзды құрғақ уәдемен алдай алмайсын. Саяси жүйемен қатар, халықтың санасыда да жаңғыруда. Нақты нәтиже 10-20 жылдан кейін емес, алдағы уақытта болғаны жөн. Халықтың күтіп жатқаны осы», - деді Ерлан Ахмеди.

Сондай-ақ ол бұл жауапты жұмыста «AMANAT» партиясының рөлі ерекше екенін атап, партия соңғы бір жарым жылдың ішінде елімізде іске асқан өзгерістерді жүзеге асырудың алғы шебінде болғанын алға тартты.

«Партия Төрағасы Ерлан Қошанов атап өткендей, «AMANAT» үшін Жолдау стратегиялық маңызды құжат болмақ.  Сондықтан да алдағы уақытта жаңарып келе жатқан үкіметтің жұмысы «AMANAT» фракциясының қатаң бақылауында болады. Ал, Президент қойған міндеттердің барлығын заңнамалық деңгейде сапалы орындалуын қамтамасыз ету депутаттардың негізгі жұмысына айналмақ. Сонымен қатар, бұл жұмыста қоғам да белсенділігін танытқаны жөн. Халықтың салиқалы ойлары мен салмақты пікірлері де алға қойған мақсаттарды тиімді орындауға өз септігін тигізер. Бұл демократияның талабы. Осындай жағдайда ғана біз жаңа саяси мәдениеті қалыптасқан, экономикасы дамыған Әділетті Қазақстанды құратын боламыз», - деп атап өтті ол.