Абайдың кітаптары Словакияның ең ірі ғылыми кітапханасына тапсырылды

Қазақтың философы және ағартушысы Абай Құнанбайұлының 178 жылдығы қарсаңында ұлы ақынның кітаптарын Словакия астанасының университеттік кітапханасына сыйға тарту рәсімі өтті, деп хабарлады Azattyq Ruhy.

Кітаптарды тапсыру рәсімі барысында Қазақстан Елшісі Төлежан Барлыбаев Абайдың рухани мұрасының жаһандық маңызын атап, ұлы ақынның шығармашылығы құлықтылық пен гуманизмнің жоғары мұраттарының камертонына айналғанын атап өтті.

ХХІ ғасырда адамзат тап болып отырған өркениеттік сын-қатерлер аясында Абай әлемін зерттеудің өзектілігі айтылды. Дипломат Абайдың словак және ағылшын тілдерінде жарық көрген кітаптар жинағы кең ауқымды оқырмандар арасында қызығушылық танытанына сенім білдірді.

Братислава университетінің кітапханасы (ULB) – Словакиядағы ең көне, ең үлкен және оқырмандары ең көп баратын кітапхана. 1919 жылы негізі қаланған кітапхана ұзақ уақыт бойы Словакияның Ұлттық кітапханасы болып, мекеменің кітап қоры 2,5 миллион басылымнан асты. Кітапхана жинағына классикалық басылымдардан басқа ғылыми-зерттеу еңбектері мен диссертациялар, электронды құжаттар, библиографиялық мақалалар, ғылыми дәйексөздер индексінің сериялары, сондай-ақ мерзімді басылымдардың 1100 атауын қамтитын PROQUEST дерекқоры кіреді.