«Жанымызды шүберекке түйіп отырмыз»: Атырауда апатты үй тұрғындары жаңа баспана беруді талап етті

«Шыбын жанымызды шүберекке түйіп отырмыз». Осылай деп шағым айтқан бір топ атыраулық жергілікті биліктен жаңа баспана беруді талап етті, деп хабарлайды Azattyq Rýhy Алматы арнасына сілтеме жасап.

Қабырғасы 1960 жылы қаланған тұрғын үйлер қазір құлаудың аз-ақ алдында тұр. Кезінде бұл баспаналарды қомақты қаржыға сатып алған бұқара «шенеуніктердің жағдай жасалады» деп сендіргенін айтады. Сол кезде тіпті 100 аула жобасына да енгізілетінін жеткізіп, уәде еткен екен. Бірақ жылдар өтсе де жағдай оңалмай тұр. Оның үстіне, үйдің маңында сауда үйі орналасқандықтан, түн ішінде тауар тасыған ауыр көліктер тыныштық бермейтін көрінеді.

«Ыстық су бірнеше айдан бері ағып тұр. Қаншама шығын десеңізші?! «114» нөміріне хабарластық, су арнасына да айтылды. Ешқайсы жолағысы жоқ», – дейді қала тұрғыны Нұра Исалиева.

Атқамінерлердің айтуынша, кеткен кемшілікті тұрғындар өздері жөндеуі тиіс. Себебі баспана жекеменшік екен. Ал апатты деп танылған үйлерге қатысты қазір қалада екі бағытта жұмыс жүргізіліп жатқан көрінеді. Бірі – инвестор тарту арқылы іске асатын реновация бағдарламасы болса, екіншісі – әкімдік өздігінен жаңа баспана салуды қолға алыпты.  

«Қазір біз Баймұқанов көшесіндегі 30 пәтерлік апатты үйдің тұрғындары үшін тұрғын үй құрылысын жүргізіп жатырмыз. Аяқталу мерзімі 2024 жылы деп жоспарлап отырмыз», – деді Тұрғын үй-коммуналдық шаруашылық бөлімінің сектор меңгерушісі Рафхат Жолдиев.

Әзірге тұрғындарға құрылысы жүргізіліп жатқан үйлердің аяқталуын күтуден басқа амал жоқ. Жұмыс толық біткенде ғана баспана көпшілікке пайдалануға берілмек. Жалпы өңірде апатты деп танылған 82 тұрғын үй бар.