Петропавлда шет елдерден келген 30 адам карантинде жатыр

Солтүстік Қазақстан облысында жуырда шет елдерден оралған 30 адам карантинде жатыр. Олардың арасында 1 «а» санатына жататын Германия мен Испаниядан келгендер де бар. Карантинге алынғандар стационарға жатқызылып, қатаң дәрігерлік бақылауға алынды. Бұл жөнінде өңірлік комуникациялар орталығында өткен брифингте айтылды, деп хабарлайды Azattyq Rýhy тілшісі.

Солтүстік Қазақстанда коронавирус дертіне шалдығу фактісі тіркелген жоқ. Карантинде жатқандар 14 күн бойы дәрігерлердің бақылауында болады. Олардың 8-і 1 «а» санатына жататын Германия мен Испаниядан, 1 «б» санаттағы Польша және 2 санатқа жататын Таиланд, Ұлыбритания, АҚШ-тан келген жолаушылар.

«Ресеймен жалғайтын автоөткелдерде шекара қызметі барлық азаматтардың, соның ішінде Қытайдан, басқа да қолайсыз елдерден келіп жатқандар жайында мәліметтер алып, біздің департаментке жібереді. Оларды медициналық-санитарлық бақылауға аламыз. Облысымыздағы барлық мекемелер дезинфекциялаудан өткізіліп жатыр. Сауда үйлерінің, базарлардың және дүкендердің жұмыс кестесіне өзгерістер енгізілді. Тұрғындар көп баратын қоғамдық орындар да зарарсыздандырылуда», - дейді СҚО тауарлар мен көрсетілетін қызметтердің сапасын бақылау департаментінің бөлім басшысы Күлпаш Таласбаева.

Брифингте өңір дәріханаларындағы медициналық масқа мен антисептикалық құралдар тапшылығы жайында да айтылды.

«Әрине елде болып жатқан жағдай барлығымызды алаңдатып отыр. Дегенмен, дәріханалардан медициналық маскалар мен антисептиктарды, парацетамол сынды басқа да дәрілерді көптеп сатып алудың қажеті жоқ. Өзгелерді де ойлау керек. Ал, жалпы облыс бойынша дәрілер бар. Өткен аптада ғана 24 мың дана маска әкелінген болатын. Алайда, тұрғындар оның барлығын бірден талап алды», - деді «СҚ фармацевтикалық ақпарат орталығының» директоры Тамара Анохина.

Мамандар жұртшылықты қолдан медициналық маска тігуге шақырды.

Эльмира Мәмбетқызы, СҚО