Қапшағайда 4 адам, Алакөлде бір жасөспірім құтқарылды

4 адам Қапшағай су қоймасына батып кете жаздады. Оларды Алматы облысы ТЖД Жедел-құтқару жасағының құтқарушылары құтқарып қалды, деп хабарлайды, Azattyq Ruhy Төтенше жағдайлар министрлігінің баспасөз қызметіне сілтеме жасап.

Профилактикалық патрульдеу кезінде Қапшағай су қоймасының қалалық жағажайында жағадан 100 метр қашықтықта батып бара жатқан адамдарды құтқарушылар дер уақытында байқады. Жедел жүргізілген құтқару жұмыстарының нәтижесінде 1984 және 1977 жылы туған 2 ер адам және 1986 және 1995 жылы туған 2 әйел адам жағаға жеткізілді.

Құтқарылғандарға медициналық көмек қажет болмады.
Одан бөлек, Алакөл ауданының Ақши ауылында «Калипсо» демалыс аймағының жанында Алакөлді патрульдеу кезінде ескерту қалқымаларынан асып жүзіп кеткен жасөспірім құтқарылып, жағаға аман-есен жеткізілді.
Оған да медициналық көмек қажет болмады.