Түркістан облысында жергілікті тұрғынды азаптады деп айыпталған полицейлер бостандықта жүр

Түркістан облыстық прокуратурасының өкілі Сауран ауданы полиция бөлімінде болған азаптау оқиғасына қатысты пікір білдірді деп хабарлайды «Отырар» телеарнасы.

Облыстық прокуратураның басқарма басшысы Қаныбек Тоқсанбаевтың айтуынша, жергілікті тұрғынды азаптады деген күдікке ілінген бес полицей де қазір бостандықта жүр. Олардың ешбіріне қатысты қамауда ұстау шешімі шығарылмаған.

Бұған дейін сот күдікті полицейлердің бәрін ақтап шығарған екен. Судья азаптау фактілеріне ешбір дәлел жоқ деген шешімге келген. Алайда, прокуратура қайта шағым түсіріп, істі қайта қозғатыпты. Прокурорлар азаптау фактісінің болғанына сенімді.

«Олардың кінәсін дәлелденген жоқ деп бәрін ақтап шығарған. Тергеу кезінде де олар бостандықта болды», - деді Тоқсанбаев.

Облыстық прокуратураның өкілдері мұнан кейін Бас прокуратураға өтініш түсіріп, апелляциялық сот шешімін бұздырған.

«Бас прокуратура бізді қолдады және Жоғарғы сотқа негізсіз ақтау үкімі бойынша шағым түсірді. Содан кейін Жоғарғы сот аталған үкімнің күшін жойып, істі қайта қарауға рұқсат берді», - дейді облыстық прокуратураның өкілі.

Еске салайық, бұған дейін Нұрболат Өмірбековтің аудандық полиция ғимаратында азапталғаны жөнінде жазған болатынбыз. Полицейлер оған мал ұрлығы қылмысын мойындату үшін азаптаған. Алайда, ұсталған азаматтың мал ұрлығына еш қатысы жоқ екені анықталып, ол құзырлы органдарға шағым түсірген.