Қариялар мемлекеттік мекеме пайдасына зейнетақы өндіруді тоқтатуды талап етті

Azattyq Rýhy

Әлеуметтік орталықта 262 қария тұрады

Қариялар мемлекеттік мекеме пайдасына зейнетақы өндіруді тоқтатуды талап етті
фото uzreport.news сайтынан

Алматыдағы "Шаңырақ" әлеуметтік орталығындағы қариялар мемлекеттік мекеме пайдасына зейнетақы өндіруді тоқтатуды талап етіп отыр, деп хабарлайды Azattyq Rýhy Almaty.tv телеарнасына сілтеме жасап.

Қарттардың наразылығы әкімшіліктің бәріне бірдей жағдай жасамауынан туындаған. Сөздерінше, тіпті кей кездері қажетті дәрі-дәрмекті де өз қаражатына сатып алады.

Инесса Зотова 13 жылдан бері қарттар үйінде тұрады. Кезінде лауазымды қызмет атқарып, зейнетке шыққан. Қазір орталықтың жұмысына да белсене арласып, қарттардың құқығын қорғағым келеді дейді.

«Дәрі-дәрмекке тапсырысты қаңтарда бергенбіз, наурыз айында келді. Қарт кісі болған соң аяқ қақсайды, түрлі жақпа майлар керек. Оны өзіміз сатып алуға мәжбүрміз», – деді «Шаңырақ» әлеуметтік орталығының тұрғыны Инесса Зотова.

Зейнеткерлер дәрі-дәрмекті күтіп қалатын кездер болады дейді. Жалпы 262 тұрғыны бар әлеуметтік орталықта 79 мүмкіндігі шектеулі қарт кісі бар. Мұндағы медициналық қызметкерлердің сөзінше, олар дәріге мұқтаж емес, бірақ аса күтімді қажет етеді.

Аталмыш әлеуметтік орталықта 2002 жылдан бері тұрып келе жатқан Адасгүл Аққұлова мәселенің түйінін тендерді жою арқылы шешуге болады дейді.

«Тендерді кім ойлап тапты? Оны жою керек. Әрине, ол үшін тиісті мекемеге хат жолдау керек», – деді зейнеткер Адасгүл Аққұлова.

Ал орталықтың жаңа тағайындалған директоры қордаланған мәселелерді шешіп жатқанын айтты.

«Менің келгеніме төрт ай болды. Ата-әжелер бұрынғы мәселелерді қайта көтеріп, шағым айтып жатыр. Қазір мәселе жоқ», – деді «Шаңырақ» әлеуметтік қызмет орталығының директоры Тұрарбек Тұманшиев.

«Медициналық әлеуметтік қызметтік мекемеде 1-3 ай уақыт болмаса, оның ақшасын ұстау заңда қарастырылмаған. Біз министрлікке хат жолдадық», – деді қалалық әлеуметтік қызмет көрсету орталығының бас маманы Аязби Қаблан.

×
Бұл желілік ресурстың ақпараттық өнімдері 18 жастан асқан адамдарға арналған.