Түркістанның экс-әкімі Рашид Аюпов шөптен жасалған «Тауыс» кешені үшін 107 млн теңге жұмсаған

Түркістанда қаланы абаттандыру жұмыстарымен соңғы бірер жылда негізінен бір компания айналысып келген. Әкімдіктің осы бағытқа бөлген қаражатының көп бөлігін «БУРА-ЮГСТРОЙ» ЖШС игеріпті. Аталған компания тек 2021 жылы мемлекеттік тапсырыс ретінде 4,1 млрд теңгенің жұмысын алса, оның көп бөлігі Түркістан қаласы әкімдігінің тапсырысы екен. Қызығы сол, 96 мемтапсырыстың 71-і «БУРА-ЮГСТРОЙ» ЖШС-ға бір көзден берілген.

Бұл тақырыпты жазуымызға жасанды шөптен жасалған екі тауыстың бағасы себеп болып отыр. Facebook әлеуметтік желісінің қолданушысы – жергілікті тұрғын Амангелді Қалыбектің жазуынша, Түркістанның орталығына тұрғызылған кешен үшін қала әкімдігі былтыр «БУРА-ЮГСТРОЙ» компаниясына 107 млн теңге төлеген. Келісімшарт бір көзден сатып алу әдісі арқылы жасалған. Ал, сол кезде белсенділер кешеннің бағасын білмек болғанда, әкімдік өкілдері оны демеушілердің есебінен тұрғызылғанын айтыпты.

Фото: Tengrinews.kz

Контрагенттерді тексеретін ресми дереккөзден арнайы есеп ала отырып, біз Түркістан әкімдігі осы «БУРА-ЮГСТРОЙ» ЖШС туралы бұдан өзге де өте «қызықты» мәліметтер таптық.

Компания мемлекеттік сатып алулардың көбін бір көзден алады. Әрі тапсырыстардың көбін Түркістан әкімдігінің «Инфрақұрылым және коммуникациялар бөлімінен» алады екен. Еріксіз назар аударатын бірнеше тапсырысы мен оның құнын ұсынып көрейік. Айта кетейік, екі тарап арасында жасалған шарттар «аумақты абаттандыру» ретінде сипатталған.

Мәселен, 2021 жылдың 2 қыркүйегі күні әкімдік осы компаниямен 120 млн теңгеге шарт жасасқан. Мемлекеттік сатып алудың негізгі сипаттамасы «Аумақтарды жөндеу/абаттандыру жұмыстары» деп аталады. Алайда, осы келісімшарт аясында инфрақұрылым бөлімі компанияға қоғамдық модулді дәретхана орнату үшін 120 млн (!) теңге төлеген. Әкімдік бюджеттен осындай 15 туалет салдырған.

Ал, жуырда ғана, осы жылдың ақпанында бұл компания бір көзден сатып алу арқылы Түркістан қаласы әкімдігінен жарты миллиард теңгенің тендерін ұтып алған. Келісімшарт биыл, 2022 жылдың соңына дейін игерілуі керек.

Қаражат «Түркістан қаласындағы Р-33 суаратын каналды жөндеп, абаттандыру үшін төленіп отыр. Бюджеттен осы абаттандыру жұмысына арналған қаражат былтыр ақпанда бөлінген.

Міне, компания бірнеше жылдан бері Түркістан қаласы әкімдігінен осындай миллиардтаған мемлекеттік тендерді бір көзден сатып алып отырған.