Өзін-өзі жұмыспен қамтыған жұмыскерлер үшін арнайы салық режимдері енгізілмек - Еңбекмин

Azattyq Rýhy

Ақмәди Сарбасов Мемлекет басшысы қойған міндеттердің іске асырылуы туралы хабардар етті

Фото: ашық дереккөзден

Елімізде өзін-өзі жұмыспен қамтыған жұмыскерлер үшін арнайы салық енгізілмек, деп хабарлайды Azattyq Rýhy. 

ҚР Еңбек және халықты әлеуметтік қорғау бірінші вице-министрі Ақмәди Сарбасов Үкметтің кезекті отырысында Мемлекет басшысының осы жылғы 8 ақпандағы Үкіметтің кеңейтілген отырысында айтылған тапсырмалары қалай іске асырылатыны туралы айтып берді.

Ақмәди Сарбасов сөзінің басында халықтың нақты табысы экономикалық өсу мен еңбек өнімділігіне тікелей байланысты екенін хабарлады.

Соңғы он жылда ЖІӨ өсімі қызмет көрсету саласы есебінен 62%-ға қамтамасыз етілді, ондағы еңбек өнімділігі өңдеу өнеркәсібіне қарағанда айтарлықтай төмен.

«2015 жылдан бастап жұмыс орындарының 37% - ы еңбек өнімділігі төмен секторларда, негізінен білім беру, денсаулық сақтау, мемлекеттік басқару сияқты мемлекеттің қатысуы басым салаларда құрылды. Жұмыс орындарының тек 8% - ын өнімділігі жоғары салалар құрады. Нәтижесінде жұмыспен қамтылған халықтың 41 пайызы табысы мен өнімділігі төмен салаларда жұмыс істейді.

Осыған байланысты негізгі міндет тұрақты және өнімді жұмыс орындарын құру қарқынын арттыру болып табылады. Ол үшін жергілікті атқарушы органдар инвестициялық жобалар тізбесі мен құрылатын жұмыс орындарының саны бар өңірлік жұмыспен қамту карталарын бекітуі тиіс», – деді Ақмәди Сарбасов.

Вице-министр сондай-ақ, жұмыс орындарын құру мониторингі салық және зейнетақы аударымдары мен электрондық еңбек шарттары бойынша деректерді тексере отырып, ақпараттық жүйе арқылы қамтамасыз етілетінін айтты.

Ол азаматтардың табысын арттыру бойынша шаралар кешені халықтың барлық санаттарын қамтитынын атап өтті.

«Азаматтық қызметшілердің жекелеген санаттарының (педагогтар, медицина қызметкерлері, әлеуметтік қызметкерлер, мұрағатшылар, кітапханашылар, техникалық персонал және т.б.) жалақысын арттырудан және инфляция деңгейін ескере отырып, жәрдемақы мөлшерін жыл сайын индекстеуден басқа бірқатар заңнамалық бастамалар қабылданады», – деп хабарлады Ақмәди Сарбасов.

Осылайша, экономиканың қажеттіліктеріне қарай еңбек ресурстарының дағдыларын дамыту үшін кәсіптік біліктіліктерді тану жүйесі қалыптастырылатын және қызметкерлердің дағдыларын сертификаттау енгізілетін болады.

Өзін-өзі жұмыспен қамтыған жұмыскерлер үшін еңбек қатынастарын рәсімдеудің жаңа формалары мен арнайы салық режимдерін енгізу мәселесі қарастырылуда.

Сонымен қатар, кәсіпкерлік бастамаларды қолдау және жұмыспен қамту инфрақұрылымын цифрландыру арқылы халықты жұмыспен қамтуды кеңейту бойынша шаралар қабылданады.

Халықтың қажеттіліктерін ескере отырып, Әлеуметтік кодексті қабылдау әлеуметтік қолдау шараларының тұтастығын, қолжетімділігін және белсенділігін қамтамасыз етеді.

×
Бұл желілік ресурстың ақпараттық өнімдері 18 жастан асқан адамдарға арналған.