СҚО-да көмір тапшылығы мәселесі шешілген жоқ

Солтүстік Қазақстанда көмір тапшылығы мәселесі әлі күнге шешімін таппай келеді.  Өңірде әсіресе, жоғары сұранысқа ие «Шұбаркөл» қатты отыны жетіспей тұр. Бүгін таңсәріден теміржол тұйығында кезекке тұрған жүк көліктерінің саны 100-ден асты, деп хабарлайды Azattyq Rýhy тілшісі.

Теріскей тұрғындары қыс маусымында орта есеппен 400 мың тонна көмір тұтынады. Көпшілігі Шұбаркөл кен орнында шығарылатын қатты отынды сатып алады. Көмір бағасы сапасына қарай 9-15 мың теңге аралығында. Мамандардың мәліметінше, облыста «Қаражыра», «Екібастұз», «Майқұба» көмірінің қоры жеткілікті. Бірақ оның сапасы көпшілік көңілінен шықпайды. 

«Көмірді күтіп жүргенімізге 10 шақты күн болды. Аз-аздан әкеледі. Сондықтан жетпей қалады. Бүгін тағы кезекте отырмыз. Соңғы келгендер бос қайтуы мүмкін», - дейді Петропавл тұрғыны Азамат Елеусізов. 

«Кеше келіп қарап кеттім. Бүгін міне тағы осында жүрмін. Көмірді алып үлгермейтін шығармын. Онда ертең тағы келуге тура келеді. Небәрі 2 тонна қажет еді. Үйге көмір жеткізудің машақаты көп. Бұл жақта кезек алып үлгерсең, кейде үйге жеткізер көлік табылмай қалады. Сонымен сенделіп жүрміз», - дейді Еркін Дүйсентаев.

Бүгін Жұмысшы кентіндегі қоймаға көптен күтен 490 тонна Шұбаркөл көмірі әкелінді. Көмір алу үшін облыс аудандарынан да келгендер бар. Қатты отынды әр көлікке 5 тоннаға дейін ғана тиеуге рұқсат. Өңірде көмір таплышығы мәселесі жыл сайын қайталанады. Бірақ түбегейлі шешімін таппай келеді. 

«Кезекте тұрған көліктердің көбеюі Шұбаркөл көміріне деген сұранысқа байланысты. Өйткені, оның сапасы жақсы. Аталған қатты отын бағасы әзірге көтерілмейді. Қазір 4 қоймада 1800 тона көмір бар. Есіл және Қызылжар аудандарында теміржол жоқ. Сондықтан олар көмірді облыс орталығынан әкетеді», - дейді  Энергетика және тұрғын үй-коммуналдық шаруашылығы басқармасының басшысы Бақыт Ілиясов. 

Әкімдіктегілердің айтуынша, облысқа көмір тасымалы жылыту маусымы аяқталғанша жалғаса бермек. Алдағы уақытта Шұбаркөлден тағы 120 вагон қатты отын жеткізілмек. 

Эльмира Мәмбетқызы