Вакцина алып, коронавирустан қайтыс болғандардың созылмалы ауруы болған – Алексей Цой

Әлемде тәулігіне 500 мыңнан астам адам коронавирус инфекциясын жұқтыруда. Ал тіркелген жағдайлардың жалпы саны 204 миллионнан асады. 4,3 млн астам адам осы індеттен көз жұмды. Бұл туралы Денсаулық сақтау министрі Алексей Цой бүгінгі Үкімет отрысында айтты.

Көп елдерде жағдай әлі де тұрақсыз. КВИ тіркелген мемлекеттердің көш басында Америка (78 млн), Еуропа (60 млн), оңтүстік-шығыс Азия елдері (38 млн) және Шығыс Жеророта теңізі елдері (12 млн) тұр. Ал елімізде соңғы бір апта ішінде жұқтыру көрсеткіші 10 пайызға артқан.

«Қазақстанда шілде айында дельта штамының анықталуына байланысты сырқаттанушылықтың өсуі тіркелді, бірақ тамыз айының басынан бастап Нұр-сұлтан қаласында КВИ жұқтыру көрсеткіші өсуінің баяулауы және Covid-19 бойынша эпидемиологиялық жағдайдың тұрақтануы байқалады. Тамыздан бастап елімізде індеттің таралу индексі 1,11-ден 1,01-ге дейін, яғни 9%-ға төмендеді», - деді Алексей Цой.

Ведомство басшысы елдегі вакцинациялау статистикасының көрсетікішіне тоқталып өтті.

«Бүгінде вакцианының бірінші компонентін 5,9 млн адам қабылдады. Ал екінші дозаны алғандардың саны 4,5 млн адамды құрайды. Бірінші дозаны алғандардың ең аз көрсеткіші Маңғыстау облысында (33,1%) байқалады. Өңірлер жеткілікті мөлшерде вакцинамен қамтамасыз етілген», - деді министр.

Алексей Цойдың айтуынша, сырқаттанғандардың 99,9%-ы вакцина алмағандардың қатарынан. Сондай-ақ, аурудан көз жұмғандардың 97,7%-ы вакцина салдырмағандар, ал екпе алып, кейін коронавирустан қайтыс болғандардың созылмалы аурулары болғаны анықталған.

Әсел Оршыбекова, Нұр-Сұлтан