ШұғылCOVID-19: Қазақстанда вирус жұқтырғандар саны 406 мыңнан асты

Қазақстанда 15 мыңнан астам шетелдік азамат еңбек етеді

Қазіргі уақытта елімізде шетелдік жұмыс күшін пайдаланатын 1 718 жұмыс беруші бар

Фото: ашық дереккөзден

2021 жылғы 1 мамырдағы жағдай бойынша 15 443 шетелдік азамат жергілікті атқарушы органдардың рұқсаты бойынша Қазақстан Республикасының аумағында еңбек етеді, деп хабарлайды Azattyq Rýhy ҚР Еңбек және халықты әлеуметтік қорғау министрлігінің баспасөз қызметіне сілтеме жасап.        

Шетелдік жұмыс күшін (бұдан әрі – ШЖК) тартуға берілген рұқсаттардың ішінде мынадай санаттар бар: бірінші санат – 650 (басшылар және олардың орынбасарлары), екінші санат – 3 246 (құрылымдық бөлімшелердің басшылары). Тартылған ШЖК-нің негізгі бөлігі үшінші (мамандар) және төртінші (білікті жұмысшылар) санаттарға жатады – тиісінше 7 511 адам және 488 адам. Сондай-ақ маусымдық жұмыстарға – 1 723 адам, ал корпоративтік ауыстыру шеңберінде – 1 825 адам тартылған.

Қазіргі уақытта Қазақстанда ШЖК пайдаланатын 1 718 жұмыс беруші бар. Оларда шамамен 478 мың Қазақстан азаматы жұмыс істейді, бұл жалпы жұмысшылар санының 96%-ын құрайды.

Еңбекші мигранттар шығатын негізгі елдер келесідей: Қытай – 3 656 адам, Өзбекстан – 1 741 адам, Түркия – 1 588 адам, Үндістан – 1 090 адам, Ұлыбритания – 930 адам.

Естеріңізге сала кетейік, ішкі еңбек нарығын қорғау мақсатында ҚР Еңбек және халықты әлеуметтік қорғау министрлігі жыл сайын елімізге шетелдік мамандарды тартуға арналған квота белгілейді. 2021 жылы квота мөлшері жұмыс күшіне шаққанда 0,31%-ды немесе 29,3 мың бірлікті құрады.