Алматыда ұшақ апатынан зардап шеккен 2 адам есін жиды

Дәрігер олардың жағдайын «ауыр, бірақ тұрақты» деп бағалады

Алматыдағы №4 қалалық клиникалық ауруханасының бас дәрігері Сағи Бейсенбеков 13 наурызда болған әскери ұшақ апатынан зардап шеккен Ұлттық қауіпсіздік қызметі қызметкерлерінің қазіргі жағдайы туралы айтты.

«Ұшақ апатынан зардап шеккен екі азаматтың жағдайы ауыр, бірақ тұрақты. Реанимация жағдайында бақылауда. Екеуі де есін жиды», - деді бас дәрігер.

Еске сала кетейік, 13 наурызда Нұр-Сұлтан-Алматы бағытындағы АН-26 әскери ұшағы радардан жоғалып кетіп, Алматы әуежайы маңында апатқа ұшырады. Апат салдарынан 4 адам қаза тауып, екі адам №4 қалалық клиникалық ауруханасына жеткізілді.

Ұшақ апаты болған күні Мемлекет басшысы Қасым-Жомарт Тоқаев әуе апатының себептерін анықтауды тапсырды.

Алматы әуежайында апатқа ұшыраған ұшақта қаза болған әскери қызметкерлердің туыстары мен жақындарына көңіл айтамын.Жарақат алғандардың тезірек сауығып кетуін тілеймін.Менің тапсырмам бойынша әуе апатының себептерін анықтау жұмыстары басталды.Бұндай оқыс оқиғалар қайталанбауыкерек
— Qasym-Jomart Toqayev (@TokayevKZ) March 13, 2021