Қазақстаннан жарты жылда 26 мыңға жуық адам көшіп кетті

2019 жылдың қаңтар-шілде айларында Қазақстанға 6 714 адам қоныс аударса, 25 758 адам көшіп кеткен, - деп хабарлайды Azattyq Rýhy тілшісі ҚР Ұлттық экономика министрлігінің статистика жөніндегі комитетіне сілтеме жасап.

Осылайша көші-қон 19 044 адамға теріс сальдо көрсетті. 

Қазақстанға жеті айда ТМД-дан – 5 494 адам, өзге мемлекеттерден – 1220 адам келсе, сәйкесінше 23 432 және 2 326 адам көшіп кеткен. Нәтижесінде, ТМД елдері бойынша теріс сальдо – 17 932 адамды, өзге мемлекеттер бойынша – 1 106 адамды құрады.

2018 және 2019 жылдардың қаңтар-шілде айларын салыстыратын болсақ, Қазақстанға келгендер саны 8,1 пайызға азайып, көшіп кеткендер көрсеткіші 17,6 пайызға көбейген. Елдің көші-қон алмасуы негізінен ТМД елдерімен жүріп жатыр.

Ел ішінде көшіп-қонушылар саны 25% артып, 622 мың 837 адамды құраған. Өңіраралық алмасуларға сәйкес, халық көші-қонының оң сальдосы елдің төрт аймағында: Маңғыстау облысы (497 адам), Шымкент (1271), Нұр-Сұлтан (17 398) және Алматы (18 892) қалаларында байқалады.